36 жастағы АҚШ спортшысы 2011-2018 жылдар аралығында UFC-де күш сынасып, өз салмағында қарсылас шақ келтірмеді. «Күшті тышқан» деген жанама атқа ие Деметриус сол атағын 11 мәрте сәтті қорғап, аталған ұйымның рекордын жаңартты. 2018 жылдың жазында Генри Сехудодан ұпай санымен ұтылғаннан соң ол ONE FC-ге ауысты. Алғашқы үш кездесуде жеңіске жеткенімен, былтыр көктемде бразилиялық Адриано Мораеске есе жіберді. Үстіміздегі жылдың 27 тамызында қос мықтының жолы қайта түйісті. Бұл жолы Джонсон Мораесты тіземен теуіп, есінен тандырды. Осылайша, америкалық саңлақ алтын белбеуді беліне тақты. Аралас жекпе-жектен барлығы 37 кездесу өткізген Деметриус 32 рет жеңіске жетіп, 19 қарсыласын сұлатып салды. Төрт рет ұтылып, бір бәсекеде тең есеп тіркелді.
34 жастағы Қайрат Ахметов те кезінде ONE FC-дің чемпионы болған. Кейіннен қандасымыз ол атақтан айырылды. Десек те қазақ жігітінің соңғы кездегі қарқыны қуантарлық. 2008 жылдан бері бес рет жекпе-жекке шыққан Қайрат сол бәсекелердің барлығын өз пайдасына шешті.
