Індетті Жетісайға «жеткізген» азаматша 21 наурыз күні Нұр-Сұлтан қаласынан Павлодар-Қызылорда бағытындағы пойызбен шығып, Қарағанды қаласына тоқтаған. Алты сағат вокзалда отырған ол, әрі қарай Петропавл – Қызылорда бағытындағы пойызбен Шымкент қаласына келген. Сөйтіп жеке көлікпен Жетісай қаласына жеткен. Наурыздың 27-інен қызуы көтеріліп ауырған ол ауруханаға 30 наурызда қаралған. Алғашқыда науқаспен қарым-қатынаста болған 16 адам анықталған-ды. Кейін бұл сан өсе түскен. Науқаспен байланыста болған адамдарды тексеру барысында, отбасының 3 мүшесінің сараптамасы оң нәтиже берді.
Ал COVID-19 сараптамасы оң қорытынды берген бесінші жағдай Алматы қаласына іссапармен барып келген азаматтан анықталды. Түркістан облысы Тауарлар мен көрсетілетін қызметтердің сапасы мен қауіпсіздігін бақылау департаментінің басшысы Нұрбек Нышанов қазіргі таңда науқастар толық дәрігерлердің бақылауына алынғанын, жағдайлары қанағаттанарлық дәрежеде екенін хабарлады. Қарым-қатынаста болған барлық адамға стационарлық оқшаулау шаралары жүргізілген. Тиісті хаттамаға сәйкес, емдік шаралар жасалуда.
Түркістан облысының әкімі Өмірзақ Шөкеев өңірде орын алған жағдайға байланысты тұрғындарға үндеу жолдады. Эпидемиолог мамандар тарапынан тіркелген ауру ошақтарында зарарсыздандыру, байланыста болғандарды табу және оқшаулау бойынша пандемияға қарсы іс-шаралар ұйымдастырылған. Инфекция табылған Жетісай ауданындағы Әбдіхалық ауылы мен аудан орталығындағы шағын ауданда карантин жарияланды. Облыстың өзге аудандарынан инфекционист және реанимотологтардан құралған 6 бригада Жетісайға аттанған. Облыстың бас инфекционист дәрігері ауданда осы шараларға басшылық етеді. Сондай-ақ облыс әкімі аудан әкіміне және тиісті органдарға елді мекендер шекарасына блок-бекеттер қоюды тапсырғанын мәлімдеді. Төтенше жағдай режімін бұзған азаматтар заң аясында жауапқа тартылатынын ескертті.
Айта кетелік, облыста Covid-19 коронавирус инфекциясынан қолайсыз елдерден келген 495 адам мониторингтік бақылауға алынған. Оның 9-ы 1 «а» санатындағы, ал 486 адам 1 «б» санатындағы елдерден келген.
Түркістан облысы
