Бұл сулы-батпақты алқапта әр мерзімде 175 түрлі суда жүзетін және су маңында өмір сүретін құстар тіршілік етеді. Оның ішінде сұңқылдақ аққу, бұйра және алқызыл бірқазан, сары, египеттік және кішкентай аққұтан, фламинго, қалбағай, қарабай, қарабасты өгізшағала, аққұйрық су бүркіттері секілді 20-дан аса құс Қазақстанның Қызыл кітабына енген.
«Қолдау-Қазақстан» көпбейінді коммерциялық емес холдингі жанындағы «Қолдау-Экология» мамандандырылған орталығының жетекшісі Ә.Қозыбақовтың сөзінше, құстар санағы әлемнің 100-ден астам елінде 1967 жылдың қаңтар айының ортасынан бастап жүргізіле бастаған. Қазірде бұл санақ жыл сайын ұйымдастырылады.
Қарақия-Қаракөл мемлекеттік экологиялық қорықшасының бөлігі болып есептелетін Қаракөлдегі құстар санағының нәтижесінде, балалар 6 сұңқылдақ аққуды, 4 мыңға жуық сыбырлақ аққуды, 300-ден аса барылдауық (жабайы үйрек), 70 сүңгуір үйректі, 50-ге жуық өзен қарқылдауығын, 2 анықталмаған ителгі, 3 аққұйрық субүркітін және 200-дей әр түрлі шағалаларды санады және жас экологтар сараптама үшін ауаның, судың, топырақтың сынамаларын алды. PASCO әмбебап құралының көмегімен судың, топырақтық, ауаның температурасын анықтап, ауа ылғалдылығын, барометриялық қысымды су мен топырақ қышқылдығын өлшеді.
– Қаракөлдегі құстардың саны жөніндегі біздің үш жыл бойы жинаған деректеріміз орнитолог-мамандарға суда және оның маңында өмір сүретін құстар жөніндегі ақпаратты жаһандық тұрғыдан көруге көмек береді деген үміттеміз. Санақ барысында алынған үлгілер Қаракөлдегі тіршілік ететін жануарлардың проблемаларын зерттеу үшін жүргізілетін ғылыми жобаларға пайдаланылады, – дейді аталған мектеп директорының ғылыми-әдістемелік жұмыстары жөніндегі орынбасары Бақытгүл Жақсылықова.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
