Биылғы байқауға өз елімізден, Ресей, Өзбекстан, Моңғолия, Армения және Болгариядан жиылған 40 шақты жас әнші қатыспақ. Қыркүйектің 5-і мен 10-ы аралығында өтетін бұл конкурстың негізгі ерекшелігі – алдыңғы байқауларда жеңіске жеткен әншілердің қазылық етуі. Атап айтқанда, КСРО халық әртісі және Мемлекеттік сыйлықтың лауреаты Бибігүл Төлегенова төрағалық ететін қазылар алқасының құрамында «Астана опера» опера және балет театрының жетекші солистері, Қазақстанның Еңбек сіңірген қайраткерлері Талғат Мұсабаев, Сүндет Байғожин, Дина Хамзина және Башқұртстан Республикасының еңбек сіңірген артисі Альфия Каримова мен Өзбекстанның халық әртісі Рамиз Усманов бар.
Баспасөз мәслихатында Бибігүл Төлегенова осынау өнер бәйгесінің тарихы туралы әңгімелей келе, оның негізін қалаған өз қызы Мәриямгүл Төлегенова екенін айтты. Егер ол тірі болғанында биыл 65 жасқа толады екен. Сондықтан дәл осы жолы өткізілетін байқау Мәриямгүлді еске алуға арналатынын мәлімдеді. Сондай-ақ, дарынды жастар жүлде алып жататын бұл шараның олардың шығармашылық өміріндегі елеулі бір белес екенін де жеткізді. «Біздің байқауда топ жарған жастардың көпшілігі қазір жер жүзін аралап, өнер көрсетіп жүр. Қазіргі кезде өнеріңді танытудың жолы көп. Біздің жас кезімізде мұндай мүмкіндіктер жоқтың қасы еді», деді бұлбұл әнші. Ол сондай-ақ, жүлде қорының да қомақты екенін, бас жүлдеге 10 мың доллар көлемінде қаржылай сыйақы берілетінін алға тартты.
Байқау барысында жас орындаушылар классикалық әндерді де, халық әндерін де орындайтын болады. Бұл жағынан алғанда байқау қазақ музыкасының таңдаулы үлгілерін орындау мәдениетін жаңғыртуға да қызмет етпек. Сынақ іріктеу және ақтық кезеңдерден тұрып, барлық тыңдаулар Қарулы күштердің Ұлттық әскери-патриоттық орталығында, көпшілік алдында өтпек. Жүзден жүйрік жеңімпаздар 10 қыркүйекте «Қазақстан» орталық концерт залында марапатталады.
Айгүл СЕЙІЛ,
«Егемен Қазақстан»