Көрме тақырыбы – полигон зардабы. Өйткені, көрме авторы полигон аймағында туып-өскен. Яғни, ядролық жарылыс зардаптарын көзімен көрген, жанымен сезінген. Сондықтан да, ешқашан ұмытуға болмайтын қасіретті қағаз бетіне бейнелеуді мақсат тұтыпты. Жұмысы кәдімгі қағазға қара қарындашпен салынған қарапайым графика.
Көрме сөресінен орын алған 20-ға жуық туындының дені – қасірет картиналары. Атап айтқанда, «Зобалаң», «Дерт», «Орындалмайтын арман», «Екі күн», «Жарылыс», «Қорқыныш» т.б.
«Орындалмайтын арман» атты картинаға назар аударыңыз: қос қолы жоқ мүгедек бала алдында шашылған асыққа қарап мұңайып отыр. Яғни, ұл-
дың қолын жалмаған қасірет – ядролық сынақ. Сол сияқты, алапат жарылыстан соң аспанда пайда болатын сәулелі шеңбер құдайдың күнімен қосақтасып, соның кесірінен бесіктегі сәбиін шырылдай қорғаған ана бейнесі, қазақтың қарашаңырағын талқандай жарылған тақсіреттің салдарынан көгі сөгілген кереге, жібі үзілген босаға... қазақ айтатын «күлің көкке ұшсын» дәл осы емес пе?!
Қысқасы, суретші қазақ қасіретін, бояумен тамаша жеткізе білген.
Бекен ҚАЙРАТҰЛЫ,
«Егемен Қазақстан»
