Аталмыш спорт түрі өрт сөндіру тәжірибесінде жеке түрде де, топтық түрде де әртүрлі әдістерді орындауға негізделген. Қиындығы мол әрі жауапты қызметтің спорт түрінде өткізілуіне қызығушылар мен қатысуға ниет білдірушілер өте көп. Сайысқа іріктелген 18 топтың қатысуы – осының айғағы.
«Өрт сөндіру қызмет қана емес, өнер, спорт. «Апат айтып келмейді» дегендей, мамандар келеңсіз жағдайларға әруақытта дайын болуы керек. Бүгінгі сайыс осы дайындықты шыңдайтын, тәжірибе алмасатын алаң болады деп сенеміз», дейді «Өрт сөндірушілер мен құтқарушылардың спорт федерациясы» қоғамдық бірлестігінің атқарушы директоры Дәурен Данаев.
Жарыс оқу мұнарасының терезесіне шабуыл сатысымен көтерілу, 100 метрлік кедергілері бар жолақтан өту, 4х100 метрге өрт сөндіру эстафетасы және жауынгерлік қанат жаю сынды төрт кезеңнен тұрады.
Спортшылардың ептілігі, төзімділігі және қозғалыс үйлесімділігі секілді физикалық қасиеттері жарыстың алғашқы күні Құрық ауылының стадионында 4х100 метрлік өрт сөндіру эстафетасында сыналды. Әрқайсысы 100 метрлік 4 кезеңнен тұрып, спортшылар қолдарында эстафеталарымен (өрт сөндіру оқпаны) төрт кезеңді жүріп өтті. Бірінші кезеңде спортшы үйшіктің шатырына тетік-сатының көмегі арқылы көтеріледі, екінші кезеңде 2 метрлік дуалдан өтеді. Үшінші кезеңде түтікқұбырды қосақтап, бумнан жүгіріп өтіп, түтікқұбырды өрістетілуге жалғайды да, түтікқұбырлы жолаққа орналастырады. Мәреге жетер төртінші кезең көріністік қозғалыспен аяқталады – қатысушы өрт сөндіргішпен жайпақ тетіктегі жанып жатқан сұйықтықты сөндіреді.
Жарыстың алғашқы күнінің қорытындысы бойынша жалпыкомандалық сынақта бірінші орынға Маңғыстау облысының командасы, екінші орынға Павлодар облысының командасы ие болса, Астана қаласы-
ның құрама командасы үшінші орынға табан тіреді.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы