Табиғаттың толысып, миуаның, бақшаның піскен кезі қаланың көркін ғана келтіріп ғана қоймайды, молшылықты да, байлықты да паш еткендей болады. Қостанай тойы айнала бау-бақтарда өсетін көкөністердің, гүлдердің, жемістердің көрмесінсіз өткен емес. Бұл жолы да бау-бақша көрмесі мерекеге жиналғандарға қуаныш сыйлады, саябақ ұстайтындардың мерейін өсірді, мереке көркін асыра түсті. Қазақстанның солтүстігі демесеңіз, Қостанайда да табаға шыжғырғандай ыстықтар болып тұрады. Қала тойы күні болған ыстықты да қостанайлықтар жазымен күткен екен. Ал солтүстіктің жаңбырлы, шыбынсыз жаз болып тұратын ауа райына бейімделген жеміс-жидек –Тобыл өңірінің бір байлығы. Қала күнінде өткен «Алтын алма-2017» фестивалі осы ойымыздың айғағындай болды. Әрине, қостанайлық сорттар Алматының апортымен таласа алмас, дегенмен дәмі тіл үйіреді.
– Алмасыз Қостанай жазын қалай елестете аласың? Алманың сортын ешкім түгелдеп санап бере алмайтын шығар, өте кең жайылған жеміс ғой. Қостанайда алманың «уралочка» сорты өспейтін бау жоқ деуге болады. Алманың бұл түрі күзге қарай піседі, жесең де тәтті, қысқа сақтау үшін түрліше өңдеуге де болады, тосап қайнатасың да, компот жабасың ба, кептіресің бе – бәріне де қолайлы. Қостанайлық бақшашылар алма түрлерін шелектеп әкеліпті, қандай сұлулық десеңші!–деп таңданысын жасыра алмады Қостанай қаласының тұрғыны Меңзада Қалмағамбетқызы.
Жыл сайын қала мерекесінде коллекция жинаушылардың көрмесін ұйымдастыру дәстүрі бар. Биыл кезек самаурын, үтік жинаушыларға тиіпті. Алтынай Аманованың үйінде басқаға болмаса да самаурынға орын табылады. Ол тұрмысқа шыққанда еншісіне берген самаурынды күтіп ұстады. Одан кейін анасы бір самаурын, достары да бір самаурын сыйлады. Осыдан кейін өзі самаурын жинауды әдетке айналдырды. Дүкенде, біреудің үйінде самаурын көрсе айналшықтап шыға алмайтын. Қазір Амановтардың үйінде мыс самаурыннан бастап сувенир самаурынға дейін осы бұйымның жүзге тарта түрі бар. Оны қала мерекесінде қызықтағандар да көп болды.
Күннің ыстығына қарамастан қала мерекесінің қызығы күні бойы толастамады. Мереке шеңберінде өткен кішкентай бүлдіршіндердің «Кішкентай мисс» байқауы да рухани азық сыйлады. Қыз баланың тәрбиесін паш еткен байқауға 7 мен 9 жас аралығындағы 7 қыз бала қатысты.
– Байқау мақсаты – жүлделі орындарға таласу емес, мерекеге жиналғандарға, әсіресе ата-аналарға қуаныш сыйлау еді. Қала күні шеңберіндегі бұл байқауды біз әр баланың балалық шақтың бақытын сезінуіне айналдыруды жөн көрдік. Сондықтан бұл байқауда жүлделі орындар болмайды, аталым бойынша барлық қатысушы бүлдіршіндерге ойыншықтар мен кітаптар сыйладық,–дейді «Мирас» мәдениет үйінің директоры Светлана Петрова.
«Кішкентай мисс» байқауына ата-аналармен қатар қыздар оқитын мектептер де атсалысты. Өнерімен сахна сәніне айналған кішкентай қатысушылар Ақбаян Жұмаш, Диана Кичкайло, Виктория Морщакова, Зара Алтынбаева, Амира Жарасбай, Дарья Шевченко, Анастасия Иванова байқауды нағыз мерекеге айналдырды.
Мерекенің сәні қашанда ән мен күй емес пе? Күні бойы қала орталығындағы сахнада «Карнавал» би ансамблі, джаз-бенд, облыстық филармонияның әртістері мен көркемөнерпаздар ұжымдары, «Алтын микрофон» балалар республикалық байқауының қостанайлық жүлдегерлері өнер көрігін қыздырды. Мереке шеңберінде Кавказ халықтары мәдениетінің фестивалі өткен болатын. Оған еліміздің түрлі қалаларынан келген өнерпаздар қатысты. Тау халқының делебені қоздыратын биі мереке қызығын үстемелей түсті.
– Біз Кавказ халықтарының өнер фестивалін қатарынан бес жыл бойы өткізіп келеміз. Биыл оны Қостанай қаласының мерекесіне орайластырдық. Тау халықтарының биі кімге де болса ұнайды,–дейді Достық үйінің баспасөз хатшысы Зүлфия Набиева.
Мереке спорт жарыстарынсыз да болған жоқ. Машинаны тарту, қой көтеріп тұрып, жүресінен жаттығулар жасау секілді халықтық ойындар да жұртты қызыққа бөледі. Мерекеде балалар салған сурет бақытты елдің тыныш, молшылық өмірінен хабар бергендей болады.
Облыс әкімі Архимед Мұхамбетов қостанайлықтар мен қала қонақтарын мерекемен құттықтады. Әкім сөзінде Қостанай қаласының жыл сайын өсіп, өркендеп, гүлденіп келе жатқанын тілге тиек етті. Ол туған жерді гүлдендіруге еңбегі сіңген қостанайлықтар: мемлекеттік қызмет ардагерлері Сабыржан Ахметовке, Вера Семеноваға, Қазақстанның халық ақыны Әсия Беркеноваға, шаруашылық ұйымдастырушы Өмірзақ Ихтиляповке «Қостанай облысының құрметті азаматы» төсбелгісін табыс етті. Сонымен қатар заңгер Тұрсынбай Жармұхамедов, спорт ардагері Олжабай Сәрсенбаев, кәсіпкер Сергей Сотников «Қостанай қаласының құрметті азаматы» атанды.
Еліміздің астық державасы Қостанай облысының басты қаласы – Қостанайдың мерекесі тәуелсіз еліміздің өркендеуін паш етті.
Нәзира ЖӘРІМБЕТ,
«Егемен Қазақстан»
ҚОСТАНАЙ
Суреттерді түсірген
Николай СОЛОВЬЕВ