– Тұрғындар жинаған ақшаларына пәтер алып, ерекше қуанышты. Бұл мемлекеттік қолдаудың, салымшылардың тілек-талап, еңбектерінің нәтижесі. Барлығы кезінде депозит ашып, тұрақты түрде ақша салып отырды. Қазір Тұрғын үй құрылыс жинақ банкі «Баспана» бірыңғай тарифтік бағдарламасын іске қосу арқылы тағы да жеңіл, тиімді жолдарын жасауда. Енді банк салымшылары қанша жыл ақша жинап, қандай пайызбен тұрғын үй заемын алатындарын өздері шешеді, – дейді банктің жергілікті филиалының директоры Талғат Байылов.
Жаңа үйдегі пәтердің бір шаршы метрі 140 000 теңгені құрайды. Баспанаға ие болу үшін банк клиенттеріне пәтер құнының 30 пайызына тең қаражатты есеп-шоттарында жинау керек.
Мысалы, Наталья Недильконың отбасы құны 8,4 миллион теңге тұратын 2 бөлмелі пәтер үшін 6 жыл бойы ақша жинапты. Жинағандары 4,2 миллион теңге. Жетпейтін қаражатты банк 6 жылға тұрғын үй заемы түрінде береді. Несие бойынша ай сайын 68 мың теңге төлейді.
2009 жылдан бері банкке қаражат жинаған салымшы Ләззәт Сембекова да пәтер алып, қуанышты көңіл күйде.
– Жыл басынан бері өңірде 109 мың шаршы метр үй пайдалануға берілді. Қазір «Сарыарқа» шағын ауданында аумағы 24 мың шаршы метр болатын 360 пәтерлі үш үй салынуда. Осындай әсем, сапалы үйлер тұрғызған құрылысшыларға да рахмет. Қоныс тойы құтты болсын! – деді облыс әкімі Б. Бақауов.
Жергілікті филиал мәліметінше, қазір өңірдің әрбір 15-ші тұрғыны үйге деп ақша жинайды. Қазіргі жинақтаушы қор 21,6 млрд теңгені құрайды. Сондықтан, банк қолжетімді бағамен тағы да тұрғын үйлер салмақшы. Өңірде «Нұрлы жер» бағдарламасының аясында жеке тұрғын үйлердің де құрылысы басталды. Бұл жоба үшін облыс орталығында, Ақсуда, Екібастұзда жер телімдері бөлінуде.
Фарида БЫҚАЙ,
«Егемен Қазақстан»
ПАВЛОДАР
Суретті түсірген
Валерий БУГАЕВ
