Оқиға орнына мемлекеттік құрылымдар мен құқық қорғау органдарының өкілдері келіп, жедел шаралар арқылы оқиғаның алды алынды. Алайда, бірқатар азаматтар қоғамдық тәртіпті бұзып, жағдайды ушықтырмақшы болған. Есіл аудандық прокуроры тәртіп бұзушылардың жауапқа тартылатыны туралы ресми ескерту жасады.
Ішкі істер министрлігі Мемлекеттік тіл және ақпарат департаменті өкілінің хабарлауынша, жанжал Үндістаннан келген мас жұмысшыны күзетші нысан аумағына кіргізуден бас тартқаннан кейін туындаған. Осыдан кейін ол отандастарын шақырып, күзетшіні соққыға жыққан. Жергілікті жұмысшылар болса, күзетшіге болысып, соның салдарынан төбелес туындап, оған шамамен 30 адам қатысқан. «Ішкі істер органдары келеңсіздіктердің алдын алуға бағытталған шаралар жүргізді. Тұрғындардың орынсыз әрекеттерге бармауын және тексерілмеген ақпаратқа сенбеуін сұраймыз. Қазіргі таңда жағдай қалыпты және полицияның толық бақылауында», – деп хабарлайды жоғарыда аталған департамент өкілі.
Ақпарат және коммуникациялар министрі Дәурен Абаев бұл жағдайдың ұлтаралық сипаттағы жанжал емес екенін айтып, халықты дүрлікпеуге, сабыр сақтауға шақырды. Сондай-ақ, әлеуметтік желі қолданушылардан арандатушылық сипаттағы жалған ақпараттар таратпауды сұрады. «Қазіргі кезде бұл кикілжің толығымен шешілді. Біздегі мәліметтер бойынша жанжалдан зардап шеккендер жоқ. Тұрғындардың алаңдауына да еш негіз жоқ екенін, барлық мәселенің бейбіт жолмен шешілетінін айтқым келеді», деп атап көрсетті министр.
