Өзге өңірлермен салыстыра қарағанда бұл оң үрдістің геометриялық қарқыны Ақтөбе аймағында басым екені айқын байқалады. Осындай жағымды, оң демографиялық және агломерациялық өсім мен фактор алдын ала мұқият ескерілген өңірде қазіргі күні 25 жалпы орта білім беретін мектептің құрылысы қарқынды жүргізіліп келеді. Алдағы оқу жылынан бастап 11 мыңға жуық баланың ойдағыдай білім алуына арналған мектеп ғимараттары құрылысына 25 миллиард теңгеден астам қомақты қаражат бөлінген.
Ал күні кеше ғана еліміздің түкпір-түкпіріндегі мектептерде қоңырау соғылып, жаңа оқу жылы басталып кеткені мәлім. Қоңырау сыңғырымен бірге мыңдаған ақтөбелік өрендер оқуды сыңғырлаған су жаңа ғимараттарда бастауға мүмкіндік алды. Жүздері қуаныштан жайнаған жас ұландардың осы мерейлі де бақытты сәттеріне Ақтөбе облысының әкімі Бердібек Сапарбаев ортақтасып, олардың алдағы қадамдарына сәт-сапар тіледі.
Айталық бүгінгі күні облыс орталығында құрылыс кеңінен қанат жайған аудандардың бірі «Батыс-2» тұрғын үй аумағы болса, бұл жерде тұрғындар санының өсуіне орай жаңа мектеп ғимараттарының бой көтеруі қажеттігі ешқандай талас туғызбайды. Солай болды да. Осындағы 320 және 620 оқушыға арналған жаңа мектептер сапалы білім беру нормалары мен жоғары стандарттарға сәйкес тұрғызылған.
Жаңа білім беру нысандары ең соңғы үлгідегі жаңа технологиялармен, оқу кабинеттерімен, компьютер-кітапханалармен жабдықталған. Сонымен бірге спорт және мәжіліс залдары, мультимедиялық құрал-жабдықтарымен интерактивті тақталар да жаңа мектеп ғимараттарының бәсі мен мәртебесін биіктете түседі. Дәл осындай оқу ғимаратының бірі Ақтөбе қаласының іргесіндегі Нокин ауылында да бой көтеріп, білім күні есігін айқара ашты.
Жаңа оқу жылында жаңа мектеп ғимараттарының пайдалануға берілу рәсімі шалғайдағы Шалқар, Ырғыз, Ойыл және Мұғалжар аудандарын да өткізілді. Олардың әрқайсысы 600 оқушыға арналған. Осы орайда елдің шеті мен желдің өтінде орналасқан аудандарда тұрғызылған бүгінгі заманның биік талаптарына толықтай жауап бере алатын білім беру нысандары облыстағы апатты жағдайда тұрған және үш ауысымдық білім беретін мектептерді айта кетудің өзі үлкен мәртебе.
Осылайша облыста аталған санаттағы мектептерді жою жөніндегі белгіленген іс-шаралар мен кешенді жұмыстар әжептәуір шешімін тапты деп түйін жасауға толық негіз бар. Сөз соңында Ақтөбе аймағында білім күні оқушылар мен ата-аналардың және ұстаздардың қуаныштарын көл-көсір қылған жаңа мектеп ғимараттары Елбасы белгілеп берген «Нұрлы жол» бағдарламасының тигізген шапағаты екенін оқушылар назарына беруді басты парызымыздың бірі деп білеміз.
Темір ҚҰСАЙЫН,
«Егемен Қазақстан»
Ақтөбе облысы
Суретте: Жаңа мектептердің ашылу рәсімінен көрініс
