Жалпы, Жапония Орталық Азияны өзінің сыртқы саясатындағы аса маңызды өңір ретінде қарастырады. Бұның негізгі 3 себебінің бірі – өңірдің Еуразия құрлығының кіндігінде орналасқандығы, яғни Ресей, Қытай сынды ықпалды елдермен шектесетіні болса, екіншіcі – халықаралық қоғамдастық алдында тұрған проблемаларды шешу тұрғысынан да маңызды аймақ саналатыны. Бұл тұста Ауғанстанды тұрақтандыру, есірткі трафигіне, терроризмге қарсы тұру, Азиядағы қауіпсіздікті қамтамасыз ету мәселелері қаперге алынатыны белгілі. Ал үшінші фактор, ол әрине, Орталық Азияның табиғи ресурстарға бай екендігі. Жапония біздің елімізбен арадағы ынтымақтастықты осы үш факторды негізге ала отырып дамытып келеді. Бір атап өтерлігі, бұл ынтымақтастық 25 жыл ішінде Орталық Азияның әр елімен әртүрлі деңгейде болғанмен, тұтастай алғанда тұрақты қалыпта өрбіп отырды. Соның ішінде Қазақстан мен Жапония арасындағы екіжақты байланыстар да саяси-экономикалық, мәдени-әлеуметтік сипаты жағынан мазмұнды болғаны рас. Бұған мемлекет басшылары деңгейіндегі барыс-келіс қарым-қатынастар мен түрлі саладағы бірлескен жұмыстар, халықаралық мәселелердегі өзара қолдаулар айғақ. Сонымен қатар, Жапония тарапы Орталық Азия мемлекеттеріне дамушы елдер ретінде де түрлі көмек көрсету бағдарламаларын жүзеге асырып келеді. Соның бірі JICA (Жапон халықаралық ынтымақтастық агенттігі) желісі бойынша көрсетілетін жәрдем екенін атап өткен жөн. Бұл турасында кейінірек айтылатындықтан, алдымен Орталық Азия + Жапония диалогы туралы кеңірек тоқталсақ.
Диалог қалай басталды?
Алыс қиырда жатқан мемлекеттің Орталық Азиядағы елдермен ынтымақтастығын дамытуға арналған бұл форматтың идея авторы – Жапонияның бұрынғы сыртқы істер министрі Иорико Кавагучи. Бір қызығы, Иорико ханымның бұл идеясының іске асуына Қазақстанның сол кездегі сыртқы істер министрі Қасым-Жомарт Тоқаевтың да көмегі тиген екен. Жапондық әріптесінің ойын білген Қ.Тоқаев сол жылы, яғни 2004 жылы тамызда Орталық Азия сыртқы істер министрлерінің басқосуына дейін тараптардың келісімін алуға атсалысқан. «Орталық Азия + Жапония диалогының жүзеге асуы осылай басталды», дейді Токиода ұйымдастырылған симпозиум барысында Жапонияның бұрынғы сыртқы істер министрі И.Кавагучи.
Бірден айта кетейік, 10-шы Токио диалогына Орталық Азияның бес елінің өкілдері келді. Оған Қазақстан тарапынан «Астана» халықаралық қаржы орталығы әкімшілігі» АҚ басқарма мүшесі, басқарушы директоры Саясат Нұрбек қатысып, Жапониямен арадағы екіжақты ынтымақтастықтың қазіргі деңгейінен хабардар етті. Оның атап өткеніндей, елдеріміздің арасындағы шарт-құқықтық база бұл күнде әртүрлі саланы қамтитын 40-тан аса құжатпен реттеліп отыр. Елуге тарта жапон компаниясы Қазақстан экономикасының түрлі салаларында жұмыс жасап жатыр. Тек 2005-2015 жылдар аралығында тартылған тікелей инвестициялардың көлемі 6 млрд доллардан асқан.
Осы секілді көрсеткіштерді Қырғызстан, Тәжікстан, Өзбекстан және Түрікменстан тарапының өкілдері де атап өтті. Алайда, бір назар аударарлығы, диалог барысындағы талқылаулар кезінде Орталық Азия елдері Жапониямен арадағы ынтымақтастықтың экономикалық сипатына аса қанағаттана қоймайтынын, Жапонияның өңір нарығындағы қаржы-инвестициялық үлесі жеткіліксіз екені ашық айтылды. Бұл орайда, әлбетте ең алдымен Қытайдың қазіргі инвестициялық белсенділігі, «Бір белдеу, бір жол» бастамасы арқылы Орталық Азия елдерінің нарығындағы үлесін қарқынды түрде арттырып жатқаны басты уәж ретінде алға тартылды.
Бұған Жапон тарапының да өз жауабы бар. Орталық Азия + Жапония диалогы осы бес елмен тең дәрежедегі қарым-қатынас өрбітіп, әлеуметтік-экономикалық дамуына көмектесуді мақсат етеді. Бұл көмек Жапон қоры, Жапон халықаралық ынтымақтастық агенттігі (JICA) аясында жүзеге асырылып келеді. Осы ретте, JICA желісімен жүзеге асатын көмекке ерекше тоқталуға болады.
Жалпы, JICA аясында көмектің 3 түрі көрсетіледі, оның біріншісі технологиялық көмек негізінен кадрларды оқыту, тағлымдамадан өткізу, біліктілігін арттыру сипатында болса, екіншісі – қайтарымсыз гранттар ұсыну, үшіншісі төмен пайызбен несие қаражатын беру есебінен жүзеге асады. Бұл орайда аталған көмектерді ұсынарда әр елдің экономикалық жағдайы, дәлірегінде халқының жан басына шаққандағы табыс деңгейі ескеріледі. Әр елге жасалатын көмек көлемінің де әртүрлі болатыны содан. Оған қоса, Жапония халықаралық ынтымақтастық агенттігі оқыту, кадр даярлау, технологиялық көмек көрсету бағытына көбірек маңыз береді. Дегенмен, инфрақұрылымды жаңарту, көлік тасымалын жетілдіру саласында да түрлі жобаларды жүзеге асырады. Мысалы, біздің елде, Астанада сумен қамту және кәріз жүйелерін жаңғырту, жол құрылысы, медицина және табиғат апаттарының салдарын еңсеру, алдын алу бағыттарында көмек көрсетті. Бірақ бүгінгі таңда Қазақстанға грант және жеңілдікті несие түрінде көмек көрсету аяқталған деуге болады. Өйткені, Дүниежүзілік банктің мәліметтеріне сәйкес, Қазақстан қазір халқының жан басына шаққандағы табысы жоғары елдер санатында. Мұны біздің 2015 жылдан бері көмек алушы емес, көмек беруші донор елге айналып, ресми көмек туралы заңнама қабылдағанымыз да растай түседі. Сондықтан Жапония қазір негізінен технологиялық көмек көрсету, кадр даярлау, табиғат апаттары кезінде әрекет ету, алдын алу, салдарын еңсеру бағытына көбірек көңіл бөліп отыр.
Қытаймен бәсекелесу Жапонияның мақсаты емес
10-шы Токио диалогына панелдік сессиясының модераторы, тәуелсіз сарапшы ретінде қатысқан Орталық Азияны зерттеу орталығының профессоры Уяма Томохиконың айтуынша, Жапония Орталық Азия өңірінде Қытаймен экономикалық бәсекелестікті мүлде мақсат етіп отырған жоқ. «Қытай қазір қарқынды дамушы ел. Бұл қарқын тежелмеуі, көрші елдермен тығыз экономикалық ынтымақтастыққа ұмтылуы тиіс. Егер Қытайдың қазіргі экономикалық даму қарқыны тежелетін болса, оның өңірдегі елдерге теріс салдары да болуы мүмкін. Ал Жапония Орталық Азия мемлекеттерімен осы форматтағы теңқұқылы ынтымақтастықты жалғастыру арқылы өңір елдерінің тұтастай дамуына атсалысуды көздейді», дейді У.Томохико. Оның пайымдауынша, бұл мақсат бұдан әрі да солай жалғасын табуы тиіс. Бұл пікірді Жапония Сыртқы істер министрлігінің Орталық Азия жөніндегі арнаулы өкілі Тошихиро Айки де қуаттады. Ол Жапонияның біздің елдермен өткен 25 жылдағы ынтымақтастық нәтижелерін жоғары бағалай отырып, алдағы ширек ғасырда да бұл саясат жалғасатынын атап көрсетті.
Осылайша, Токиода өткен оныншы диалог өз жұмысын қорытындылады. Оның басты түйіні – Орталық Азия елдері Жапониямен ынтымақтастықтың осы форматын жалғастырып қана қоймай, оның инвестициялық мазмұнмен толыға түскенін қалайды. Бұл ой панелдік талқылаулар кезінде, әсіресе, Өзбекстан, Тәжікстан, Қырғызстан және Түрікменстанның өкілдері тарапынан баса айтылды. Сондықтан, дәл қазіргі кезеңде өңірдің өз ішіндегі өзара байланыстарының жақсара бастауы, әсіресе, Өзбекстанның қадамдары, оның көрші елдермен ынтымақтастыққа бет бұруы инвестиция салу мәселесінде барлық мәселені ерекше екшеп алғанды жөн көретін жапондық компаниялардың назарын аударады деген үміт бар.
Фредерик Старр, Орталық Азия-Кавказ институты, Жібек жолын зерттеу бағдарламасының басшысы:
Мен Орталық Азия + Жапония диалогын өте маңызды, алдағы кезеңдер үшін аса қажет, ынтымақтастықтың бірегей форматы деп бағалаймын. Мұнда Жапонияның «аға мемлекет» болу ниеті мүлде жоқ. Бұл – Орталық Азия елдері үшін тиімді. Сондықтан мен дәл осы форматтағы Орталық Азия + Жапония диалогын Үндістан тарапына да ұсынар едім. Біз көп жағдайда Қытайдың қазіргі экономикалық өрлеу үдерісін айтамыз, бірақ Үндістанның әлеуетін ұмытып кете береміз. Бұл елдің әлеуметтік-экономикалық қуаты зор және ол таяу уақытта көрініс беретін болады.
Айбын Шағалақ,
«Егемен Қазақстан» –
Токиодан (Жапония)