Қазақстан халқы Ассамблеясының өкілдері мен елордалық этномәдени бірлестіктердің мүшелері қатысқан алқалы жиында Мемлекет басшысының «Болашаққа бағдар: рухани жаңғыру» мақаласы қызу талқыланды. Сондай-ақ, олар Елбасы мақаласының басты бағыттары мен «Қазақстандағы 100 жаңа есім» жобасы бойынша ұсыныстар әзірлеу керектігіне назар аударды.
ҚХА мүшесі, Астана қаласының өзбек этномәдени бірлестігінің төрағасы Шерзод Пулатов, Мемлекет басшысы халық арасындағы достық пейілді кеңінен насихаттап, жайдары қарым-қатынасты әркез ту етуге барынша жағдай жасап келе жатқанын атап өтті.
«Кеше ғана Елбасымыз өз халқына рухани жаңғыру жолын нұсқап, еліміздің жаңа тарихи кезеңге аяқ басқандығын, қайта түлеудің айрықша маңызды екі процесі – саяси реформа мен экономикалық жаңғыруды қолға алғанымызды айтты. Осы мақсатта көзделген жұмыстардың бәрі де дер кезінде және барынша тиімді жүзеге асатындығына сенім білдірді. Президентіміз «мен халқымның тағылымы мол тарихы мен ықылым заманнан арқауы үзілмеген ұлттық салт-дәстүрлерін алдағы өркендеудің берік діңі ете отырып, әрбір қадамын нық басуын, болашаққа сеніммен бет алуын қалаймын», деп тұтас қоғамның және әрбір қазақстандықтың санасын жаңғыртудың бірнеше бағытын айқындады. Бұл − біздер үшін бағындырар бір белес», – деді Ш.Пулатов.
Сондай-ақ, отырысқа қатысушылар рухани жаңғыру мақсаты бойынша нақтылап айтылған еліміздің мықты, әрі жауапкершілігі жоғары Біртұтас Ұлт болу үшін болашаққа қалай қадам басамыз және осы мақсат жолында бұқаралық сананы қалай өзгертеміз деген мәселені де күн тәртібіне шығарды.
«Отанды сүю – бабалардан мирас болған ұлы мұраны қадірлеп, оны көздің қарашығындай сақтап, кейінгі ұрпаққа аманат етіп, табыстау азаматтық борышымыз. Елдің тұтастығы мен бірлігі, татулығы мен тыныштығын ту ету, тек лауазымды адамдардың ғана жұмысы емес, бұл баршамыздың да азаматтық парызымыз. Сондықтан, қоғамдағы әрбір қызмет етіп отырған ұжым Елбасымыздың халыққа арнаған Жолдауын қолдайтынымызды білдіре отырып, жаһандық деңгейдегі ЭКСПО-2017 көрмесінің көңілдегідей өтуіне үлес қосқанымыз ләзім», – деді Ш.Пулатов.
Айта кетейік, ұлттық бірегейлік пен қоғамдық келісімді дамытудың және ҚХА-ның елімізде этносаралық диалог орнатудағы рөлі талқыланған жиында «Тұран-Астана» университетінің экономика және инновациялық бизнес кафедрасының профессоры Орақ Әлиев те ұлттық бірегейлікті сақтау, Қазақстанның эволюциялық даму жолы туралы пікір білдіріп, әрбір отандасымыздың өз бірегейлігін түсінуі ел бірлігінің басты құралы екенін айтты.
Жолдыбай БАЗАР,
«Егемен Қазақстан»
