Қазақстандық боксшы қыз Мэйуезер академиясында шеберлік сабағын өткізеді

Қазақстанның бірнеше дүркін чемпионы, 22 жастағы кәсіпқой боксшы, Азия чемпионатының жүлдегері Фируза Шәріпова Ресейдің Жуковка кентіндегі Флойд Мэйуезер атындағы бокс академиясында шеберлік сабағын өткізеді, деп хабарлайды ҚазАқпарат. Қазақстанның боксшы қызы академия директоры Олег Жадобинмен кездескен кезде, ол Фируза Шәріповаға осындай ұсыныс айтқан екен. Шеберлік сабағы шамамен 23 ақпан күні өтеді деп жоспарланған. «1 сағат көлемінде өтетін мастер-классқа келем деушілерге есік ашық, тегін өтеді. Шеберлік сабағына жасына, спорттағы мәртебесіне, дайындық деңгейіне қарамай, кез келген адам келе беруіне болады», – дейді Фируза. Айта кетейік, Фируза Шәріпова Тараз қаласында туған. Бүгінге дейін кәсіпқой рингте үш кездесу өткізген. Алғашында ресейлік София Очигаваға есе жіберсе, қалған екі қарсыласынан басым түскен. Ал биыл көктемде титулды айқасын өткізуді жоспарлап отыр.