Еуразиялық Топтың құрамына кіретін «Қазхром» ТҰК» АҚ филиалы – Ақтөбе ферроқорытпа зауыты ардагерлер кеңесінің ұйытқы болуымен, зауыт әкімшілігінің қолдауымен 700 еңбек ардагері өздерінің қалаулары бойынша сүйікті республикалық, облыстық басылымдарға 2016 жылға тегін жазылуда. Бұл мақсатқа зауыт әкімшілігінен 2340 мың теңге көлемінде қаражат бөлінді.
Қарттарын асыл қазынасындай сыйлайтын бұл кәсіпорын жыл сайын өз ардагерлеріне тегін басылымға жазылуды дәстүрге айналдырып келеді. Бұл игі іс-шара биыл да өз жалғасын тапты. Алдағы жылы зейнеткерлер өздерінің қалауымен республикалық «Егемен Қазақстан», «Казахстанская правда» газеттерімен қайта қауыша алады.
Бұл қазіргідей қаржылық дағдарыс етектен тартқан кезде еңбек ардагерлері үшін үлкен көмек. Ең бастысы, мұны газет оқуға дағдыланған аға ұрпақ өкілдерінің өз үйі, өлең төсегінде отырып, әлемде, елде және өңірде болып жатқан жаңалықтармен, оқиғалармен танысуына туғызылған тағылымдық іс деу орынды. Бұл қаржы жоқ деп қарттарына да қараспай, қаперден шығарып алатын өзге кәсіпорындарға үлгі болатын-ақ үрдіс.
Сатыбалды СӘУІРБАЙ,
«Егемен Қазақстан».
Ақтөбе облысы.