Сенат төрағасы Мәулен Әшімбаев жаңа Конституция жобасына байланысты референдумның өту барысын бақылау үшін Қазақстанға келген Түркі мемлекеттерінің Парламенттік ассамблеясының байқаушыларымен кездесті.
Мәулен Әшімбаев ТүркПА миссиясының мүшелеріне ілтипат білдіріп, олардың мониторингі Қазақстандағы демократиялық институттардың дамуына және қоғамдағы сенімнің нығаюына ықпал ететінін атап өтті. Сондай-ақ ол бұл тәжірибе өтіп жатқан үдерістердің ашықтығы мен объективті бағалануына қосымша мүмкіндік беретінін айтты.
Сұхбат барысында Сенат төрағасы Қазақстанның Таяу Шығыстағы қақтығысты халықаралық құқық және Біріккен Ұлттар Ұйымының Жарғысы аясында дипломатиялық жолмен бейбіт реттеуді қолдайтынына ерекше назар аударды.
Өз кезегінде делегация басшысы Осман Местен миссияның объективтілік қағидаттарына берік екенін атап өтті. Ол референдумның елдің ұлттық заңнамасына және халықаралық нормаларға сай табысты өтуіне тілектестік білдірді.
Сондай-ақ Мәулен Әшімбаев Қазақстанға жаңа Конституцияға байланысты референдумға халықаралық байқаушы ретінде келген Тәуелсіз Мемлекеттер Достастығы Парламентаралық Ассамблеясының өкілдерімен кездесті.
Кездесуде Палата спикері ТМД ПАА өкілдеріне жаңа Ата заң жобасының негізгі ережелері туралы жан-жақты айтып берді. Соның аясында елдің алдағы даму бағдары, оның ішінде адам капиталын дамыту, мемлекеттілікті нығайту, Тәуелсіздік пен егемендікті күшейту және ішкі саяси тұрақтылық пен қоғамдық келісімді сақтау мәселелері сөз болды.
Өз кезегінде халықаралық байқаушылар Қазақстанда референдумды ұлттық заңнамаға және халықаралық тәжірибеге сәйкес жоғары деңгейде ұйымдастырудың маңызын атап өтті. Сондай-ақ олар референдумға мониторинг жүргізу жөніндегі жоспарлары туралы айтып берді.
Сенат төрағасы Ұжымдық қауіпсіздік туралы шарт ұйымының Парламенттік Ассамблеясы өкілдерімен де кездесті. Олар Қазақстанға Конституцияға байланысты референдумға халықаралық байқаушы ретінде келген.
Мәулен Әшімбаев ҰҚШҰ ПА делегациясын Ұйымның 20 жылдығымен құттықтап, осы алаң аясында жүзеге асырылып жатқан көпжақты ынтымақтастықтың маңызына тоқталды. Ол Қазақстан Ұжымдық қауіпсіздік туралы шарт ұйымын ұжымдық қауіпсіздікті қамтамасыз етуде маңызды рөл атқаратын құрылым ретінде қарастыратынын атап өтті.
Сонымен қатар Сенат төрағасы жаһандық тұрақсыздық күшейіп, халықаралық ахуал шиеленісе түскен қазіргі жағдайда заманауи сын-қатерлерді нақты бағалап, құбылмалы әлемнің талаптарын ескере отырып, мемлекеттік басқару мен даму жүйесін қалыптастыру айрықша маңызды екенін айтты.
Өз кезегінде халықаралық байқаушылар Қазақстанда жүргізіліп жатқан реформаларға оң баға берді. Сонымен қатар олар референдумды Қазақстан заңнамасына және халықаралық тәжірибеге сәйкес ұйымдастырудың маңызын атап өтті.