Астанадағы мамандандырылған ауданаралық қылмыстық істер жөніндегі сот ел назарын аударған қылмыстық істі аяқтады. Бұл іс мемлекеттік қорғаныс тапсырысы аясында бюджет қаржысын талан-таражға салуға байланысты қозғалған болатын, деп хабарлайды Egemen.kz.
Қаржылық мониторинг агенттігінің дерегінше, «Казспецэкспорт» РМК-ның бірқатар басшылары мен олардың сенімді жеткізушілері әскери өнімдерді сатып алуға бөлінген қыруар қаражатты заңсыз иемденген.
«Мемлекетке келтірілген залал 1,6 млрд теңгеден асты. Сот үкімімен «Казспецэкспорт» РМК бас директоры Рамазанов А.К. 11 жылға бас бостандығынан айырылды, ал кәсіпорынның департамент директоры Кудабаев А.Т. – 10 жылға сотталды. Қалған 9 айыпталушы да әртүрлі мерзімге бас бостандығынан айырылды», делінген хабарламада.
Мемлекет пайдасына 1,6 млрд теңге өндіріледі, сондай-ақ жалпы құны 607 млн теңгеге бағаланған мүлік тәркіленген.Үкім әлі заңды күшіне енген жоқ.