Грузияның бас шаһары Тбилисиде семсерлесуден ерлер мен әйелдер арасындағы әлем чемпионаты мәреге жетті. Төрткүл дүниенің әр қиырынан жиналған ең үздік нояндардың бәсекесін еліміздің құрама командасы бір қола медальмен қорытындылады.
Семсерлесуден әлем чемпионаты 1921 жылдан бері ұйымдастырылып келеді. 1937 жылы ресми жарыс мәртебесіне ие болды. Бұл бәсекелерде өзгелерге қарағанда қарт құрлық өкілдерінің табысы толағай. 1921–2023 жылдар аралығында өткен дүбірлі додаларда жеңіп алған жүлделерінің саны жөнінен алғашқы тоғыз орын еуропалықтардың еншісінде. Үздік ондықты АҚШ (12+16+18) түйіндесе, 11-орынды Украина (12+12+20) еншілеп отыр. Әлемдік додада барлығы 29 мемлекеттің әнұраны шырқалып, 44 елдің туы көкте желбіреді.
Жекелеген спортшылар жайында айтар болсақ, ерлер арасында ең көп олжаға кенелген – Аладар Геревич. ХХ ғасырдың 30–60 жылдары аралығында атой салған Мажарстанның мақтанышы әлем чемпионатында 19 (14 алтын+2 күміс+3 қола) жүлде олжалады. Геревичпен иық тіресе өнер көрсеткен италиялық Эдоардо Манджаротти 26 (13+8+5) медальды мойынында жарқыратты. КСРО атынан қатысқан Станислав Позняков (10+5+2), Владимир Назлымов (10+3+2), Александр Романьков (10+2+3), мажарстандық Пал Ковачтың (10+2+0) қоржындарында 10 алтыннан бар. Әйелдер арасында италиялық Мария Валентина Веццалимен ешкім теңесе алмайды. ХХ ғасырдың соңы мен ХХІ ғасырдың басында бақ сынаған ол жеңіс тұғырына 26 (16+6+4) мәрте көтерілді. Мажарстанның мықтысы Илона Элек 18 (11+5+2) жарыстан олжалы оралды. Ол 1933–1956 жылдары жасындай жарқылдады. Жаңа ғасыр табалдырықтан аттаған тұста асқан шеберлігімен дүйім жұртты тәнті еткен Апенин түбегінің тағы бір аруы Арианна Эрриго 22 (10+7+5) додада дараланды.
Әлем чемпионатында жеңіс тұғырына көтерілгендер қатарында еліміздің де өкілі бар. Ол – Руслан Құрбанов. 31 жастағы Алтайдың тумасы 2023 жылы Миланда өткен жарыстың семсер жаттығуында қола медальға қол жеткізді. Р.Құрбанов тек мажарстандық Мате Тамаш Кох пен италиялық Давиде Ди Веролиден қалып қойды. Екінші қола медальды франциялық Ромен Канон иеленді. Русланның Азия ойындарының үш дүркін жүлдегері, құрлықтың төрт дүркін чемпионы, Дүниежүзілік универсиаданың екі дүркін жүлдегері деген атақтары тағы бар.
Тбилисиде, өкінішке қарай, жекелеген сайыста бірде-бір жерлесіміз жеңіс тұғырына көтеріле алмады. Есесіне командалық жарыста жолымыз болды. Құрамында Руслан Құрбанов, Вадим Шарлаимов, Елмир Әлімжанов, Кирилл Проходов сынды сайыпқырандары бар командамыз жартылай финалға дейін барлық қарсыласын сыпыра ұтты. Олардың қатарында Ресей, Қытай, Италия секілді мықты ұжымдар болды. Одан кейін Жапонияға бір ғана ұпаймен есе жіберді. Үшінші орын үшін тартыста Францияның нояндарын 45:31 есебімен айқын ұтып, қола медальды олжалады.