2025 жылғы 12 маусымда Ахмадабад қаласында орын алған Air India әуе компаниясының ұшағының апатына қатысты Үндістанның Азаматтық авиация апаттарын тергеу бюросы (AAIB) алғашқы тергеу қорытындысын жариялады, деп хабарлайды Egemen.kz.
Құжатқа сәйкес, ұшақ жердегі бірнеше ғимаратпен соқтығысып, соның салдарынан өртеніп кеткен және толықтай жойылған. Апат салдарынан бес ғимарат отқа оранып, айтарлықтай құрылымдық зақымға ұшыраған.
AAIB мәліметтері бойынша, ұшақтан екі борттық тіркеуші құрылғы (қара жәшік) табылған. Олардың біреуі апаттан үш күннен соң өртенген күйінде табылса, екіншісі құлаған ғимараттың маңынан табылған. Екі құрылғыда да соққы мен жоғары температураның іздері байқалған. Жазбаларда соңғы алты рейс бойынша шамамен 49 сағаттық дерек, соның ішінде апатқа ұшыраған рейс те тіркелген.
Аудиожазбадағы диалогтан экипаж мүшелері арасында отынмен байланысты тосын жағдай туындағаны белгілі болған. Бір ұшқыш отынды өшіргені үшін әріптесінен сұраса, екінші ұшқыш мұндай әрекет жасамағанын, жағдайдың күтпеген жерден болғанын айтқан.
Алдын ала нұсқа бойынша, апатқа қозғалтқыштарға отын берудің кенеттен тоқтауы себеп болуы мүмкін. Бұл жағдай ұшақ сағатына 333 км (180 торап) жылдамдықпен қозғалып келе жатқан кезде орын алған. Осы сәттен бастап екі қозғалтқыштың да қуаты төмендей бастаған.
AAIB ұшақтың ұшу салмағы рұқсат етілген шекте болғанын және бортта қауіпті жүктер тіркелмегенін хабарлады.
Тергеу жалғасып жатыр.