Атырау облысының Доссор кентінде ашылған жаңа өрт сөндіру депосы 40 шақырым радиустағы 15 мыңнан астам адамның өртке қарсы қауіпсіздігін қамтамасыз етіп, төтенше жағдайларға ден қою уақытын едәуір қысқартады, деп жазады Egemen.kz.
Салтанатты ашылу рәсіміне Төтенше жағдайлар министрі генерал-майор Шыңғыс Әрінов пен Атырау облысының әкімінің орынбасары Қайрат Нұртаев қатысты.
ТЖ министрінің айтуынша жаңа депода құтқарушылардың тұрмысы мен жарақтандырылуы елордалық бөлімдерден кем түспейтін деңгейде қамтамасыз етілген. Бұл тәсіл шақыруларға тез ден қоюға мүмкіндік беріп қана қоймай, өңірлерге білікті кадрларды тартуға және олардың сол жерде тұрақты қызмет атқаруына септеседі.
«Мұндай жобалардың жергілікті әкімдіктердің белсенді қолдауымен жүзеге асырылып жатқаны ерекше маңызды – бұл жергілікті жерлерде төтенше жағдайлардың профилактикасы мен оларға дайындықтың маңыздылығын түсінетінін көрсетеді. Бүгінгі жаңалық тәсілдің өзгеріп жатқанын растайды: біз жаңа нысандарды салып қана қоймай, тиімді жұмыс істеу үшін толыққанды жағдай жасаймыз», деді министр.
Төтенше жағдайлар министрлігінің баспасөз қызметінің мәлімдеуінше заманауи модульдік ғимарат жергілікті бюджет есебінен қысқа мерзімде салынған әрі тәулік бойы жұмыс істеуге қажетті барлық заттармен жабдықталған: диспетчерлік бөлме, оқу сыныбы, демалыс бөлмелері, ас үй. Кезекші ауысымның қарамағында – үш машина, оның ішінде автоцистерналар мен жедел ден қою автокөлігі бар.
Доссор кентінде депо ашу ауылдық жерлерде өртке қарсы инфрақұрылымды дамыту жөніндегі мемлекеттік бағдарламаның бөлігі болып табылады. Биыл облыстың бірнеше аудандарында осындай нысандарды салу жоспарланып жатыр.