Л.Н.Гумилев атындағы Еуразия ұлттық университетінде «Кәусар» мәдени-танымдық орталығының ұйымдастыруымен «Оқымысты» атты кездесу өтті. Мемлекеттік сыйлықтың лауреаты, әдебиет сыншысы, профессор Құлбек Ергөбекпен кездесуді Қазақстанның еңбек сіңірген әртісі, өнертану профессоры Кенжеғали Мыржықбай жүргізді.
Кездесу барысында Құлбек Ергөбек әдебиет, ғылым, руханият, сын мәдениеті және кітапхана ісі сынды өзекті мәселелерге тоқталып, өз өмірі мен ұстаздар тағылымын тебірене әңгімеледі. «Жоғары мектептегі ұстаздарым ерекше болды. Бірінші курста Бейсенбай Кенжебаевты тауып алып, шәкірті ғана емес, перзентіндей болып кеттім. Ғылымдағы жолым осыдан басталды» деп әсерлі әңгіме өрбітті.
Кездесуде профессор қазіргі қазақ балалар әдебиетінің жағдайына алаңдаушылық білдірді. Әдебиетпен ауызданбаған, ертегі естімеген ұрпақтың болашағы күңгірт.
«Балалар әдебиеті құлдырады. Алпысыншы, жетпісінші жылдардағы биік деңгейден бүгінгі жазушылар алыстап кетті. Балалар жазушысы болып қалыптаспайды – балалар жазушысы болып туады. Ондай тұлғалар бізде саусақпен санарлық. Жаңа дәуірдің Айтолмандары, Жәнібек Кәрібозиндері, Жақан Смақұлдары жоқ», – деді ол. Сондай-ақ Мемлекет басшысы Қасым-Жомарт Тоқаевтың балалар әдебиетіне ерекше мән беріп, 2021 жылды – Балалар әдебиетінің, ал 2022 жылды – Балалар кітабының жылы деп жариялағанын құптады.
Құлбек Ергөбектің руханиятқа қосқан тағы бір үлесі – оның жеке кітапханасы. Ол жиырма жылдан бері Түркістанда түркі халықтары кітапханасын дамытып келеді. Қазір оның қорында 24 тілде 6000-нан астам кітап бар. Бұл – қазақ ғылымының ертеңі үшін жасалған тарихи еңбек.
Кездесуде сөз алған филология ғылымдарының докторы, профессор Серік Негимов Құлбек Ергөбектің қазақ руханиятындағы орнын жоғары бағалады. «Ол қоғамның ең көкейкесті, ең күрделі, ең жаралы тақырыптарын ашық көтерді. Ішімізде жүрген, бірақ айта алмаған мәселелерді ашық, нақты жеткізді», деді С.Негимов. Сонымен қатар филология ғылымдарының докторы, профессор Тұрысбек Рақымжан: «Құлбек бауырымыздың екі ерлігі мен бес бағыты бар. Оның біріншісі – Бейсенбай Кенжебаев секілді алып ұстаздың рухани мұрасын тірілтіп, туған баласындай өмірін арнауы. Екіншісі – Сәбит Мұқановтың шығармашылық әлеміне өмір бойы адал болуы. Бұл екеуі – сирек кездесетін рухани ерлік. Ал бес бағытқа келсек, Құлбек Ергөбектің қазақ балалар әдебиетіне сіңірген еңбегі, әдеби дамуға қосқан үлесі, сын саласындағы қызметі, қазіргі әдебиеттен қол үзбеуі және әдеби үдеріспен үздіксіз байланысы – мұның бәрі қадірлеуге лайық қызмет», деді.
Кездесу соңында Мемлекеттік Елтаңбаның авторы, сәулетші-профессор Жандарбек Мәлібекұлы Құлбек Ергөбекке Мемлекеттік Елтаңба бейнеленген арнайы төсбелгіні салтанатты түрде табыстады.
Ерлан КИІКБАЙ,
ЕҰУ студенті