Кез келген өнертабыс қаншалықты керемет болса да, оны халыққа дұрыс таныстыра білу маңызды. Кейде алғашқы көрсетілімдер сәтсіз аяқталып жатады.
1760 жылы бельгиялық Жан-Жозеф Мерлин Лондонда өткен салтанатты кеште өзінің жаңа өнертабысы – роликті конькиді ерекше таныстырғысы келді. Ол сәнді туфлиінің астына кішкентай металл дөңгелектер орнатып, қолына скрипка алып, көпшіліктің арасына жарқ етіп шықты. Жұрттың бәрі аңтарылып қарады. Бірақ Мерлин бұл кезде роликтерді тоқтату жүйесін ойлап таппаған еді. Сөйтіп, өнертапқыш зырылдап келіп, қабырғадағы қымбат айнаға соғылып, жалп етіп құлайды. Дегенмен бұл сәтсіздік роликті конькидің танымалдылығын одан сайын арттырып, халық арасында бірден сұранысқа ие болды.