«TikTok»-тағы тағылымды тартыс

Статистикаға сүйен­сек, елімізде «Insta­gram»-ға – 12,1 млн, «Facebook»-қа – 2,6 млн, ал «TikTok»-қа 14,1 млн қолда­ну­шы тіркелген. Соңғы атал­ған платформаның қазақ қоға­мына қаншалықты тамыр жайып үлгергенін осы де­ректен айқын аңғарамыз. Бұны қолдана алсаң – игілігің, қолдана алмасаң – қиғылығың. Сондықтан жеткіншекті жетектеген желіде қызықты һәм пайдалы контенттің өте-мөте көп болғаны дұрыс.

«Бұл байқауды үшінші рет өткізіп отырмыз. Желідегі жарысқа қызығушылықтың жыл сайын артып келе жат­қаны айқын аңғарылады. Аталған жоба педагогтерді шығармашылық тәсілдер із­деуге шабыттандырып, білім алуды қызықты етіп көрсете­ді деп үміттенеміз. Визуал­ды және интерактивті форматтар ұстаздарға ақпарат­ты қолжетімді әрі тартымды етіп жеткізуге көмектеседі», деді Орталық Азиядағы «TikTok» Операциялық бөлімінің басшысы Саиф Муджахид.

Енді мыңнан жүйрік шық­қан үш жеңімпазды таныс­тырып өтейік. Байболат Сей­дахан – математика пәнінің мұғалімі. Ол қазақ тілінде мил­­лиондаған қаралым жинай­тын бейнежазбалар дайын­дайды. Танымалдылығы­­ның сыры – күрделі есептердің шешу жолдарын қарапа­йым әрі түсінікті етіп түсін­діруі, сондай-ақ логикалық тапсырмалар ұсынуы. Бай­болат математикалық білімнің өмір­дегі нақты мәселелерді ше­шуге қалай көмектесетінін көрсетіп, теорияны практикамен ұштастырады. Оның бас­ты мақсаты – математиканы тек формулалар жиынтығы емес, әлемді танудың қызықты құралы ретінде таныстыру.

Ал Евгений Солоницын – оқушыларға жақын тілде сөйлейтін жас мұғалім. Ол алгебра және геометрия пән­дерін жеңіл әрі тартымды етіп түсіндіру үшін әзіл мен күнделікті өмірден алынған мысалдарды шебер пайдаланады. Мәселен, бір бейнежазбасында шөлдегі құмның мөлше­рін қалай есептеуге болатынын түсіндіреді. Евге­нийдің оқыту әдісі көпші­ліктің қы­зығушылығын туды­рып, ма­тематикаға деген көзқарасын өзгертеді.

«TikTok»-тағы тағылымды тартыста оза шапқан тағы бір жеңімпаз – Марина Фран­гулиди. Ол – 37 жылдық тәжі­рибесі бар педагог. Педагог плат­формада тек білімін ғана емес, сонымен қатар жеке ойларын, авторлық әдіс­те­ме­лерін бөлісіп отырады. Оның контенті – мұғалімнің жұмысына деген ерекше көзқарастың көрі­нісі. Мы­салы, бір бейнежазба­сында оқу­шылардың өмір­дегі же­тіс­тіктеріне қандай факторлар әсер ететінін талдап, өз ой­ларын ортаға салады. Мари­наның материалы тек оқу­шы­ларға ғана емес, басқа мұғалімдерге де жігер беріп, қолдау көрсетеді.

Бұл байқау «TikTok»-та тағылымды контенттің ма­ңыз­дылығын көрсетіп қана қой­май, ұстаздардың шығар­ма­шылығын дамытып, оқытуды жаңа форматта ұсынуға жол ашты. Мұндай бастамалар білім мен технологияны үйлестіріп, жас ұрпақтың қызығушылығын арттыруға ықпал ететіні сөзсіз.