Үкіметте энергетика және коммуналдық секторларды жаңғырту ұлттық жобасын іске асыру бойынша баспасөз конференциясы өтті. Оған Премьер-министрдің орынбасары Қанат Бозымбаевпен бірге бірқатар ведомство өкілдері қатысты.
Ұлттық жобаның мақсаты – елдегі коммуналдық қызметтерді тұрақты әрі сапалы ұсынуды, жаңа қуат көздерін салуды, инженерлік желілердің тозуын 40%-ға дейін төмендетуді қамтамасыз ету.
Бүгінгі таңда жылу, электр, сумен жабдықтау, су бұру салаларындағы 87 монополист кәсіпорынның энергетикалық және коммуналдық инфрақұрылымы 65-тен 100%-ға дейін тозған. Коммуналдық желілердің жыл сайынғы табиғи тозуы 2–3% немесе 4–5 мың км-ны құрайды.
Қолданыстағы инженерлік желілерді жаңғыртудан басқа, болашақта электр, жылу энергиясы тапшылығын болдырмас үшін жиынтық көлемі 7,3 ГВт болатын қосымша генерациялау көздерін енгізу жоспарланып отыр.
Ұлттық жобаның маңызды элементтері – жеке инвестицияларды тарту, инфрақұрылымды жаңғыртуға жеке компаниялардың қатысуын ынталандыратын тетіктерді әзірлеу, бұл мемлекеттік бюджетке қаржылық жүктемені азайтуға көмектеседі.
Ұлттық жоба шеңберінде 57 қалада 200-ден аса табиғи монополия субъектісі (70% мемлекеттік, 30% жеке) қамтылды. Әр кәсіпорынға қаржыландырудың жеке моделі таңдалады. Нарықтық, бюджеттік заемдық қаржыландыру, сондай-ақ халықаралық қаржы ұйымдарының заемы болжанады. Барлық заем ұлттық валютада болмақ.
Ұлттық жобада жеткізушілер арасында отандық өндіріс өнімдерінің үлесін қамтамасыз ету міндеттемесі белгіленіп, қолдау іс-шаралары әзірленді.
711 тауар позициясын өндіретін 187 кәсіпорынның тізімі жасалды. Бүгінгі таңда елімізде қажеттіліктің жалпы санынан 337 тауар позициясы бойынша өндірісті оқшаулау үшін әлеует бар. Сонымен қатар табысы төмен азаматтарды мемлекеттік қолдау қарастырылған. Әлеуметтік қорғау органдары келесідей шараларды ұсынады: коммуналдық қызметтерді өтеуге тұрғын үй көмегін көрсету, коммуналдық қызметтерді өтеуге әлеуметтік көмек көрсету, атаулы әлеуметтік көмек көрсету.