Іледегі іркіліс

Күрделі жөндеу қажет

Өтеген батыр ауылында Алматы об­лыс­тық балалар клиникалық ауруха­насы жұмыс істейді. 2011 жылы жұмысын бас­таған медициналық мекемеде қабыл­дау, хирургия, травматология, ортопедия, нейрохирургия, жақ-бет хирургиясы, оториноларингология, офтальмология, соматика, медициналық оңалту, қалпына келтіру емі, онкогематология, анестезиология, реаниматология, қарқынды терапия, жетілмеген, жаңа туған балалар патологиясы бөлімшелері, консультативтік-диагностикалық емхана, күндізгі стационар мен арнайы кабинеттер іске қосылған.

Ауруханада өңірдің барлық аудан­ы­­­нан келетін сырқаты ауыр бала­ларға ма­­­ман­дандырылған, жоғары ма­ман­дан­­ды­рылған медициналық көмек көр­се­ті­леді. Алайда заманауи диагностика­лық ем­деу құрылғыларымен жабдықтал­ған, кон­сультациялық-диагностикалық ­емханасы бар, 230 төсектік орындық көп­салалы балалар стационарында бірқатар проблема қордаланып қалған. Ол жөнінде өңірге келген Мәжіліс депутаттарымен кездесу барысында айтылды.

«Ауруханаға өңірдің барлық ауданынан балалар қабылданып, ем алады. Оларға жоғары білікті дәрігерлер қыз­мет көрсетеді. Десек те, шешімін күт­кен мәселелер де жоқ емес. Уақыт өт­кен сайын­ ауруханаға қабылданатын нау­қастар саны артқанымен, оларға бө­лі­нетін қаржы көлемі бұрынғы қал­пын­да қалып отыр. Мұнда Алматы облысы бо­йынша жалғыз балалар гемодиализ бө­лім­шесі, күйік орталығы жұмыс іс­тейді, күрделі опера­циялар жасалады», деген Алматы облыстық денсаулық сақ­тау басқармасының басшысы Алмат Тұрыс­бекұлы қолынан іс келетін білікті мамандар болғанымен, материалдық базаның мүмкіншілігі жетіспейтінін тілге тиек етті.

Аурухананың жан сақтау, онкогематология бөлімдерінің жұмысы өте күрделі. Мұнда науқасы ауыр балалар ем алып жатыр. Ақ желеңді абзал жандар бар білім-біліктерін салып, бала­лардың аяғынан тұруына жұмыла атсалысып жатыр. Алайда сырқат баланың денсаулығын қалыпқа келтіріп, қатарға қосатын мекеменің күйі кетіп тұрғанын жасыруға болмайды.

«Аурухана іші өте салқын болған­дықтан балаларды палатада ұстауға тырысамыз. 2011 жылдан бері күрделі жөндеу көрмеді. Ауруханаға науқас балалар ауыр және өте ауыр жағдайда аудандық ауруханалардан жолдамамен, жедел жәрдеммен, өз бетінше келіп жатады. Оларды қайтара алмаймыз. Талдау көрсеткендей, кейінгі үш жылда ауруханаға келген науқас балалар саны 29 пайызға артқан (2022 ж. – 7 446, 2023 ж. – 9 661, 2024 ж. – 10 400 бала). Әсіресе, науқастардың жағдайының ауыр­лығына байланысты, өмірлік көр­сет­кіштеріне сәйкес, стационарлық дең­гей­де ем алу қажеттілігіне қарай жедел түрде жатқызылатын науқастардың саны артып келеді. Балалар ауруларының сипаты мен қажеттіліктері жиі өзгеріп тұ­рады. Осыған байланысты желілік шкаланы балалар клиникаларына қолдан­бау бөлігінде өзгертулер енгізуді ұсына­мыз. Бұл өзгерістер медициналық қызмет­­­тер­ді сатып алу шарттарының тиімділі­гін ­арттырып, балалардың денсаулы­ғын қорғауға қосымша жағдайлар жасау­ға мүмкіндік береді. Сонымен қатар дәрі-дәрмектер, медициналық құрал-жабдықтар, коммуналдық қыз­меттер, тағы да басқа бағалардың өсуін, қызмет­кер­лердің еңбек өтілі мен санат­тылығы бойынша жалақы қорының ұл­ғаюын, жал­пы жылдық инфляция 8–10 пайыз дең­гейінде қалыптасатынын ескере келе, ауру­хананы қаржыландыру көле­мін ұл­ғай­ту қажет», дейді аурухана дирек­торы­ның медициналық қызмет сапасын бақылау жөніндегі орынбасары Назым Серікқызы.

Бала денсаулығына жауапты медици­налық мекемеге заманауи МРТ аппараты мен орталық оттегі стансасының қа­жет­тігі кезек күттірмейтін мәселе. Бұл құрал­­дар ауруханада жүргізілетін диаг­нос­тика мен емдеудің сапасын айтар­лық­тай арттырып, пациенттердің жылдам әрі тиімді ем ­алуына мүмкіндік беретін болады. Сондай-ақ науқас балаларды бас­қа медициналық мекемелерге жеткізуге реанимобиль көлігі де ауадай қажет.

«Сақалды» құрылыс қашан аяқталады?

Өтеген батыр ауылындағы 400 орын­дық мәдениет үйінің құрылысы сағызша созылып, тұралап тұрғалы біраз жылдың жүзі болды. Өткен жылдың басында жергілікті билік өкілдері басқосып, жұмыс барысы мен қаржыландыру мәселеле­рін талқылады. 2022 жылы басталған жоба келесі жылдың маусым айында пайда­лануға берілуге тиіс еді. Өкінішке қарай, миллиардтап қаржы бөлінгенмен, кестеден кешігіп келеді. Бүгінде құрылыс жұмыстары жартылай ғана аяқталған. Жауаптылардың айтуынша, алғашында мәдениет үйінің жобасында кемшілік анықталған, жер дауы да құрылысты қосымша тұсаулаған. Құры­лыс материалдарының қымбаттауы да қаражат тапшылығын туындатып отыр. Мердігердің там-тұмдап жасаған жұмыс нәтижесінде сыртқы қапталы жабылып, екінші қабатта әрлеу жұмыстары бас­талғаны байқалады. Аудан атқа­мінерлері жобаға жауапты тараптардың әрекеті мен қаржының дұрыс игерілмеуі салдарынан «сақалды» құрылыс атанған нысан қазіргі келісімшарт бойынша алдағы алты айдың ішінде аяқталатынын айтты.

Іргелі Іле ауданының орталығында бой көтерген бұл нысан ірі көлемдегі мәдениет үйі болмақ. Аудан көлемінде іс-шараларды өткізу үшін тұрғындар жылдар бойы Байкент ауылындағы мәдениет үйіне сабылады. Осы түйткілді мәселенің түбегейлі шешім табуын барша халық зарыға күтіп отыр.

«Құрылысқа облыстық бюджеттен 2,2 млрд теңге бөлінген. Алайда қаржының уақтылы бөлінбеуі салдарынан құрылыс белгіленген мерзімде аяқталмады. Өткен жылдың сәуірінде мерзімді тағы ұзарту туралы келісім жасалып, жобаның аяқталу уақыты биылғы жылдың шілдесіне шеге­рілді. Құрылысқа жауапты мердігер – «AK Construction Company» ЖШС. Қазіргі таңда құрылысты толық аяқтау үшін қосымша 805 млн теңге қажет», дейді аудандық құрылыс бөлімінің басшысы Айдос Күнесбайұлы.

Айта кетер болсақ, «Amanat» партия­сының «Халықпен бірге!» сайлауалды бағдарламасы аясында 2027 жылға дейін өңірде 25 мәдениет үйінің құрылысы, 27 мәдени нысанның күрделі жөндеу жұмыстары жоспарланған. Биыл 9 мәде­ниет үйінің құрылысы, 6 мәдениет үйіне күрделі жөндеу жұмыстары жүргізіледі. Соның бірі – Іле ауданының Боралдай ауы­лында мәдениет ошағының құрылы­сы қаланып жатыр. 280 орындық жоба­ның жүзеге асуына облыстық бюджеттен 841 млн­ теңге қарастырылған.

Алматы облысы