Бұқаралық ақпарат құралдары өкілдерінің зауыт басшылығымен болған кездесуінде біраз жайт ортаға салынды. Серіктестіктің бас директоры Олег Балыбин зауыттың өндірістік мүмкіндіктерін алға тарта келіп, сату желілері арқылы өз өнімдерін Қазақстанның кез келген өңіріне жеткізе алатынын айтты. Ол сөз ретінде еліміздің өзге де өңірлеріндегі кәсіпорындарымен байланыстар орнатуға мүдделі екендіктерін де жасырмады. Жалпы, кәсіпорын әзірге сұранысқа ие арзан да сапалы тіркемелі және аспалы ауыл шаруашылығы техникаларын шығаруды кеңейтуге ден қойып отыр. Бұл тұрғыдан келгенде Ауылшаруашылық механикаландыру ғылыми-зерттеу институтымен сынақтан өткен топырақты өңдеуге және себуге арналған ауылшаруашылық техникаларының конструкторлық құжаттарын беру туралы келісім де бар. Жақын уақыттары алғашқы нұсқалары әзірленіп, одан кейін өндіріске жаппай енгізу жоспарланған. Зауыт жылына «PVP-351» «SHABYN» жинау-престеу техникасының 200 данасын, «ПР-Ф-145» «SHABYN» техникасының 600 данасын, аспалы жер жырту құралының 150 данасын және өзге де құрал-жабдықтарды шығара бастайды. Зауытта қазіргі кезде 78 адам жұмыс істеуде.
Ауылшаруашылық кешенін дамыту жөніндегі жаңа мемлекеттік бағдарламаның басты мақсатының бірі заманауи ауылшаруашылық техникаларымен және құрал-жабдықтарымен қамтамасыз етуді арттыру, сондай-ақ еліміздегі ауылшаруашылық машиналарын жасау саласын дамыту. Аталған міндеттерді тиімді шешу үшін құрамына мемлекеттік және квазимемлекеттік сектор, ауылшаруашылық техникалары мен құрал-жабдықтарын өндіруші кәсіпорындар өкілдері кірген жұмыс тобы құрылып отыр. Жұмыс тобы отырысының қорытындысы бойынша машина-трактор паркін жаңартуды арттыруға кедергі және өндіріс деңгейінің төмен болуына ықпал ететін себептер сараланып, Ауылшаруашылық машиналарын жасаудың жол картасы әзірленді. Жол картасы қазіргі бар өндіріс қуатын арттырумен қатар, жаңа өнім түрлерін шығаруға да мүмкіндік береді деп күтілуде. Және шаруаларды шетелдік нұсқалардан бір де кем емес отандық сапалы да арзан техникалармен қамтамасыз етуі тиіс. Ауыл шаруашылығы министрлігі тарапынан бұл бағытта бірқатар шаралар қолға алынып, сәтімен жүзеге асырылып жатқанын да қаперге сала кеткен орынды. Биылғы жылдан бастап ауылшаруашылық техникасын сатып алуды субсидиялағанда ең алдымен басымдық отандық өнім өндірушілерге беріледі. Егер бұған дейін шетелдік бір комбайн үшін 30 млн теңге қаражат қажет болса, қазіргі кезде осы ақшаға 3 комбайн сатып алу субсидияланады. Және «ҚазАгро» АҚ желісі бойынша отандық тіркемелі және аспалы ауылшаруашылық техникаларын лизингке сатып алуды жеңілдетілген несиемен қамтамасыз ету жоспарланған. Осындай тетіктердің арқасында техника сатып алу көлемін 50-70 пайызға арттырып, 1,5-2 есеге дейін жаңарту көзделіп отыр. Сонымен қатар, отандық зауыттарды құрал-жабдықтар сатып алуы мен жаңартуы үшін жеңілдетілген несиемен қамтамасыз ету бағдарламасы да жүзеге асырылуда.
Асқар ТҰРАПБАЙҰЛЫ,
«Егемен Қазақстан»
Ақмола облысы