«Барыс» Минскіде «Динамодан» жеңілді

Құрлықтық хоккей лигасының тұрақты чемпионатында Астананың «Барысы» Минскіде «Динамо» командасымен кездесіп, 1:2 есебімен жеңілді. Ойында алғашқы гол 11-минутта соғылды. Александр Павловичтің соққысына қонақтар бөгет ала алмады. Осыдан кейін де қос команда алма кезек қауіпті шабуылдар ұйымдастырған. Алайда, есеп бірінші кезеңде өзгеріссіз қалды. Матчтың негізгі голдары екінші 20 минутта соғылды. 34-минутта Никита Мицкевич мергендігімен танылып, есепті еселей түсті. Араға 5 минут салып, Брэндон Боченски «Барыстың» алғашқы әрі соңғы шайбасын соқты. Кездесудің соңғы бөлігінде Эдуард Занковец шәкірттері қорғаныста сақ қимылдап, шабуылда сауатты ойнады. Алайда, орайы келген сәттер ұйымдастырылғанмен, жерлестеріміздің уысынан суси берді. Осымен 54 ойыннан 81 ұпайы бар елордалықтар «Шығыс» конференциясында әзірге 5-орында келеді. Келесі кездесуін 1 ақпан күні Астанада Хельсинкидің «Йокерит» ұжымымен өткізеді. «Минскінің «Динамосын» жеңісімен құттықтаймын. Бүгін жанкүйерлер жақсы ойынға куә болды деп ойлаймын. Командам бәрін жоспар бойынша өткізді. Таблодағы есепті бірнеше рет өзгертуімізге болатын еді. Алайда, сәттілік бұл жолы біздің жақта болмады. Айдын иелері мүмкіндіктерін тиімді пайдалана білді», – деді Эдуард Занковец матчтан кейін ұйымдастырылған баспасөз конференциясында.