Биыл «Жастар парламенті» жобасы іске қосылады

Биыл «Нұр Отан» партиясының қолдауымен «Жастар парламенті» үкіметтік емес ұйымы іске қосылады. Бірегей бастама жалынды жастардың жұмыс пен қамтылуын негізге алып, олардың саяси мәдениетін қалыптастыруға бағытталады, деп жазады 24.kz Бүгін «Нұр Отан» партиясында бас қосқан Мәжіліс депутаттары мен блогерлер, жастар ұйымдарының көшбасшылары осы мәселе жөнінде түйіткілдердің түйінін тарқатуға тырысты. Шарапаты мол шараға жиналғандар жастарды жұмыспен қамтудың негізгі тетіктеріне де басымдық берді. Ресми мәліметтерге сүйенсек, бүгінде Республика бойынша 18-29 жас аралығындағы жұмыссыздар саны 4,9 пайызды құрайды екен. Ендігі меже жастар саясатын жүйелі жүзеге асырып, оларды «Нұрлы жер» сынды мемлекеттік бағдарламаларға мейлінше тарту дейді отырысқа қатысушылар. «Елімізде Қазақстан Республикасы Мәжілісі жанынан Жастар парламенті құрылып жатыр. Негізгі басымдылығы, әрине, еліміздегі заң шығарушы, яғни заң қабылдау барысына мейлінше тарту. Яғни тікелей мінберден сөйлеуге жоба арқылы көмек беруді қамтып отырмыз. Негізгі басымдылығы – Парламенттің жұмысын ашық қылу, оның ішінде жастарды тарта отыра эксперттік топ құру», - дейді «Жастар парламентінің» үйлестірушісі Дамир Жүнісов.