Су ресурстары және ирригация министрлігі Ғылым және жоғары білім министрлігімен бірлесіп «Суды үнемде – болашақты сақта!» тақырыбында экологиялық сағат ұйымдастырды. Л.Н.Гумилев атындағы Еуразия ұлттық университетінде өткен басқосуда студенттер табиғатты қорғауға, суды сақтауға қатысты ұсыныстарға ерекше ықылас танытты.
Мазмұнды кездесуге Су ресурстары және ирригация министрі Нұржан Нұржігітов, Сенат депутаты Бекболат Орынбеков, ЕҰУ басқарма төрағасы-ректоры Ерлан Сыдықов, ЕҰУ Директорлар кеңесінің төрағасы Дархан Мыңбай қатысты. Экосағатқа университеттің 500-ден астам студенті жиылса, еліміздің өзге жоғары оқу орындарынан 2000-нан астам студент онлайн форматта қосылды. Қонақтар студенттерге былтыр қабылданған Су кодексіндегі жаңашылдықты, экономика салаларында суды үнемдеуді қамтамасыз ету бойынша атқарылып жатқан жұмысты жан-жақты баяндады. Сол секілді тұрмыстық жағдайда суды үнемдеу тәсілдері, Солтүстік Аралды сақтау, су шаруашылығы инфрақұрылымын дамыту, жерасты суын игеру бағытындағы жобалар назардан тыс қалмады. Мемлекет деңгейінде іске асып жатқан жобалардың ретін, негізгісін Су ресурстары және ирригация министрі Нұржан Нұржігітов айтып берді.
«Қазір әлемде ауызсу тапшылығын көріп отырған елдер бар. Сондықтан су мәселесі экологиялық тақырып қана емес, елдің тұрақты дамуы мен қауіпсіздігі мәселесіне айналып келе жатыр. Мемлекет басшысы атап өткендей, су ресурстарын тиімді әрі ұқыпты пайдалану – елдің орнықты дамуының негізгі басымдықтарының бірі. Сондықтан суды үнемдеу мемлекеттің ғана емес әрбір азаматтың ортақ жауапкершілігі деп түсіну керек. Осыған дейін су ресурстарын басқару жүйесін дамытудың 2024–2030 жылдарға арналған тұжырымдамасын бекіттік. Сол тұжырымдамада 17 индикатор белгіледік, болжамдарды қаперге алдық. Жас мамандар су ресурстарын тиімді басқару, жаңа технологияларды енгізу, экологиялық мәдениетті қалыптастыру ісінде айрықша рөл атқарады. Сіздердің білімдеріңіз бен жаңа идеяларыңыз келешекте су қауіпсіздігін қамтамасыз етуге үлкен үлес қоса алады», деді Н.Нұржігітов.
Бұдан соң ЕҰУ Директорлар кеңесінің төрағасы Дархан Мыңбай университеттің маман даярлау ісіне қосқан үлесі туралы баяндады.
«Былтыр желтоқсанда университет директорлар кеңесінің шешімімен «Жаратылыстану ғылымдары факультеті» «Жаратылыстану ғылымдары институты» болып қайта құрылды. Институт химия, география, биотехнология, биология, экология салаларында ғылым-білім беру кадрларын қалыптастырады. Бүгінде институтта 2 702 студент білім алып жатыр. Институт құрылымында гидрология және су ресурстары саласына маман даярлау ерекше орын алады. Осы күнге дейін университтен 316 гидролог маман білім алды, әлі де оқып жатқан студенттер баршылық. 2024 жылы Тараз қаласында Қазақ ұлттық су шаруашылығы және ирригация университеті ашылды. Бұл еліміз үшін өте маңызды қадам болғаны анық», деді Д.Мыңбай.
Осы күні Еуразия университеті студенттерінің, оқытушылары мен жас ғалымдарының үздік зерттеу жұмыстары мен жобалары таныстырылды. Экосағат қорытындысында қонақтар студенттерді қызықтырған сұрақтарға жауап берді.