Ертіс-Баян өңірінде 23 білім беру мекемесін жөндеу жоспарланған. Сондай-ақ ақпараттық технологиялар колледжінің жатақхана ғимаратын қайта жаңғырту көзделіп отыр, деп хабарлайды Egemen.kz.
Өңірдегі білім беру ұйымдарында күрделі жөндеу жұмыстарын жүргізу бойынша өткізілген конкурс рәсімдерінің жеңімпаздары анықталды.
− 2026 жылы 27 жоба аясында білім беру саласындағы 23 нысанда күрделі жөндеу жүргізу жоспарланған. Оның ішінде Павлодар, Екібастұз, Ақсу қалаларында, сондай-ақ Баянауыл, Успен, Павлодар аудандары мен Тереңкөл ауданында орналасқан 10 балабақша мен 13 мектеп бар. Бұдан бөлек, ақпараттық технологиялар колледжінің жатақхана ғимаратын қайта жаңғырту жоспарда тұр, − деп хабарлады өңірлік білім беру басқармасынан.
Мердігермен құрылыс-монтаж жұмыстарының сапасы мен мерзімдерінің сақталуы, сондай-ақ жобалау-сметалық құжаттама талаптары мен техникалық қадағалау нормаларын қатаң орындау жайы талқыланған.
Себебі бұған дейінгі жылдарда кейбір мектептердің жөндеуі кешігіп, балалардың өзге мектептерде уақытша білім алуына тура келген.
Павлодар облысы