Мемлекеттің тұрақтылығы мен қоғамның дамуы ең алдымен отбасының беріктігіне байланысты. Осы тұрғыда өнегелі әулеттердің өмір салты көпшілікке үлгі әрі тәрбиенің алтын қазығы саналады. Біз баяндағалы тұрған Игеновтер отбасының бұлжымас қағидасы да сол, маңайына ізгілік дәнін сеуіп, елдің алғысына бөлену.
Осыдан он алты жыл бұрын шаңырақтың уығы қадалған еді, қазір ордалы отбасына айналды. Отағасы Өмірхан Ақымашұлы үйіндегі он екі баланың оныншысы. Жары Гүлырысты Қамиқызы да он балалы отбасында өсіп-өнген. Содан да шығар, бала кездерінен көпшіл, бауырмал болып өскен екеуінің үйлерінен кісі арылмайды. Келген мейманын төрге оздырып, төредей күту екеуінің де бала кезден сіңген дағдысы, өнеге еткен тәрбиелері.
Екеуі де еңбекке епті. Жастайынан көліктің, техниканың тілін жетік ұғынған Өмірхан бүгінде сүйікті ісін кәсіпке айналдырып отыр. Көліктің кез келген ақауын анықтап, оны сартылдатып қалпына келтіру – күнделікті тірлігі. Алғашында көлік жөндеу орталығынан орын жалға алып, жұмыс істеп жүрген оған жеке нысан салып алу туралы ой келеді. Осыдан он жыл бұрын Қарағандыдағы «Күнгей» шағын ауданынан жер алып, жары екеуі адал еңбектің арқасында еңселі үй тұрғызды. Қазір балаларына алаңдамайды, емін-еркін өз аулаларында, көз алдарында асыр салып ойнап жүр. Жары Гүлырысты да ауылда өскендіктен шаруаға ширақ. Үй тұрғызарда жолдасына бір өзі қолғабыс етеді. Бастысы, қолдарынан келеді. Сөйтіп, үйінің іргесінен жер алып, 250 шаршы метр болатын нысан салады. Алты көлікке орын бар. Көліктің май-суын ауыстырып, қозғалтқышы, беріліс қорабы секілді кез келген бөлшекті жөндеп шығарады. Қазір балаларын да еңбекке баулып жүр. Алдағы күндері кәсіп нысанын өзге шеберлерге жалға беріп, табысын арттыруды көздейді.
Гүлырысты да жеке кәсібін ашып, отбасылық табысқа тәп-тәуір үлес қосып отыр. Нан себеттерін әзірлейді. Үйде отырып-ақ той-томалақ пен құдалыққа тапсырыс алады. Тіпті ет ыстайтын құрылғысымен жылқының қазысын, жаясын, үйректі де дәмді етіп жасайды.
Жақында мемлекет тарапынан қайтарымсыз грант алды. Ол қаражатқа қажетті құрал-жабдықтар алуды жоспарлап отыр.
«Күйеуім екеуміз балаларымызды барынша адал еңбекке тәрбиелеуді өмірлік мұратымызға айналдырдық. Бала кезінен бастап жұмсап, өзімізге қолқанат қылдық. Қазір соның қызығын көріп отырмыз. Әкесіне екі ұл, менің асүйдегі шаруама екі қызым көмектеседі. Қазы айналдыру, шұжық еттерін әзірлеуді, түрлі дәмдеуішін келтіріп, оны ыстап, кептіруді қыздарым да әжептәуір үйреніп алды. Соған қуанамын. Шаруа істеп жүріп, әкесі мен ұлдары, анасы мен қыздары болып сырласамыз. Бастысы сол, балаларымыз білімді, еңбекқор болып өссе деген әр қазақтың арманы бізде де бар», дейді шаңырақтың анасы.
Шаттыққа бөленген шағын мемлекет ұлттық құндылықтарды жоғары бағалайды. Әкелері Өмірхан үйінің ауласына киіз үй тігіп қойыпты. Ала жаздай асты қазақы үйден ішеді. Киіз үйдің ішінде қамшы, қасқырдың терісі секілді көрнекіліктер әдемі үйлесім тапқан.
«Өзіміз бала кезде киіз үйде өстік қой. Сол себепті, қазақы қасиетті ұғынып өссе екен дейміз. Бойларына ұлттық тәрбие сіңірсе ұлтқа жаны ашитын болады», дейді Өмірхан.
Бұл шаңырақ үшін әр жұма – отбасы күні. Жұманың кешінде дәмді ас дайындап, дастарқан басында жиналып, бір-біріне сыйлық үлестіріп, аптаның қалай өткенін талқылап, демалысқа жоспар құру өмір салтына айналған. Барлық ағайын-туыс ауылды аңсаса, Өмірхан Игеновтің үйіне жиналады. Өйткені ол – ырыс ұялап, құт қонған шаңырақ.
Қарағанды облысы