Астанада Astana 2025 World Boccia Challenger халықаралық турнирінің ресми жабылу рәсімі өтті. Қазақстан құрамасы жалпы саны алты медаль жеңіп алып, әлемдік спорт сахнасында өз әлеуетін тағы бір мәрте дәлелдеді, деп хабарлайды Egemen.kz.
Бұл дода – елімізде BISFed қамқорлығымен ұйымдастырылған алғашқы халықаралық бочча жарысы. Турнир 2028 жылғы Лос-Анджелес Паралимпиадасына іріктеу мәртебесіне ие болып, оған 12 мемлекеттің 56 спортшысы жиналды.
Боччаның халықаралық федерациясы (BISFed) өкілдері жарыстың жоғары деңгейде өткенін атап өтті. Олардың айтуынша, мұндай көлемдегі турнир елдің инклюзивті спортты дамытып, халықаралық ынтымақтастыққа жол ашып отырғанын көрсетті. Қазақстан параспорттағы ауқымды шараларды қабылдауға дайын екендігін дәлелдеді.
«Astana World Boccia Challenger турнирі Қазақстан үшін тарихи оқиға болды, елімізде алғаш рет осындай деңгейдегі жарыс ұйымдастырылды. 12 мемлекеттен келген 56 үздік спортшы жоғары шеберлік пен спорттық күш-жігерін танытты. Қазақстан бочча федерациясы атынан барлық жеңімпаздар мен жүлдегерлерді құттықтаймын! Біздің құрамамыз үшін бұл бастау айрықша маңызға ие. Біз параспортшыларымызға сендік, олар барлық үмітті ақтады. Бұл жеңіс бізге шабыт беріп, елдегі инклюзивті спорттың жаңа белестерін ашады», деді Парламент Сенатының төрағасы, Қазақстан бочча федерациясының президенті, Мәулен Әшімбаев.
Ол сөзінің соңында төрешілерге, бапкерлер мен ата-аналарға, еріктілер мен демеушілерге ризашылығын білдірді.
Сегіз күнге созылған турнирде спортшылар тек медаль үшін ғана емес, нағыз ерік-жігер мен шеберлікті паш етті. Қазақстандық атлеттер нәтижелі өнер көрсетіп, екі алтынды (Итиана Шыңғысханова, Балжан Бөлекпаева), екі күмісті (Азамат Аязбаев, Ерхат Алмат), бір қола медальді (Эльмира Мусралиева) және аралас жұптық сында алтынды (Эльмира Мусралиева – Азамат Аязбаев) жеңіп алды.
Финалдық сайыстарда аралас жұптық BC4 санатында қазақстандық дуэт Мусралиева – Аязбаев ирандық қарсыластарын тізе бүктіріп, чемпион атанды. Ал командалық BC4 жарысында Корея құрамасы бірінші орыннан көрінді. BC3 жұптық сында да оңтүстіккореялық спортшылар топ жарып, Италия мен Үндістанды артта қалдырды.
Astana 2025 World Boccia Challenger турнирін Қазақстан бочча федерациясы Туризм және спорт министрлігі, Sport Qory қоры, «Самұрық-Қазына» АҚ, ERG және өзге де серіктестердің қолдауымен өткізді. Бұл серіктестік жарыстың табысты өтуіне айрықша ықпал етті.
Турнирдің Астанада өтуі тек спортшылар үшін ғана емес, Қазақстанның параспорттық жүйесі үшін де маңызды кезеңге айналды.