Елімізде алғаш рет Абай атындағы Ұлттық опера және балет театрының сахнасында әлемдегі ең көне әрі ең атақты концерттік рояль өндірушілерінің бірі – «Bösendorfer» брендінің роялі таныстырылды. Әйгілі компанияның тарихы екі ғасырға жуық уақытты қамтиды.
Қазақ өнеріндегі елеулі іс-шара Астана және Алматы қалаларында алма-кезек жалғасып өтті. Сиқырлы саз төгілген музыка аспабын ел сахнасына алдыруға ұйытқы болған іс-шараның ресми серіктесі, еліміздегі «Bösendorfer» брендінің өкілі «Райно» ЖШС директорлары – Ержан Құшанов пен Рахим Тоқсанбаев.
Таныстырылым аясында брендтің көшбасшылық өнімі — «Bösendorfer 280 Vienna Concert» концерттік роялі көрсетілді. Бұл аспап күшейтілген резонанстық декасымен жабдықталған және веналық дәстүр мен заманауи технологиялардың мінсіз үйлесімін бейнелейді. Бұған дейін аталған бренд ел нарығында бұрын-соңды ұсынылмаған еді.
Рояльдердің алғашқы үлгілерінің бірі Ахмет Жұбанов атындағы Республикалық музыка мектебіне орнатылды. 2025 жылы жасалған жаңа модельдің ұзындығы – 2,8 метр және бұл қазіргі уақытта еліміздегі ең ұзын концерттік рояль.
«Бұл — біздің аустриялық әріптестерімізбен қолға алған алғашқы жобамыз. Биыл бұл аспаптарды оқу орындарына, концерттік ұйымдарға және музыкалық мектептерге кеңінен жеткізуді жоспарлап отырмыз», деп атап өтті компания өкілі Рахим Тоқсанбаев.
Аталған таныстырылым еліміздегі музыкалық мәдениет пен кәсіби білім берудің дамуына маңызды үлес қосады. «Bösendorfer» брендінің елге келуі ұстаздар мен студенттер және концерттік орындаушылар үшін шығармашылықтың жаңа мүмкіндігін ашпақ.
Іс-шара жабық форматта, арнайы шақырылған қонақтардың қатысуымен, камералық атмосферада өтті. Мәртебелі меймандардың қатарында «Bösendorfer» компаниясының бас директоры С.Грюбмюллер және брендтің топ-менеджмент өкілдері болды. Бұл кездесу халықаралық бренд пен еліміздің мәдени инфрақұрылымы арасындағы кәсіби диалогті нығайту тұрғысынан аса маңызды оқиғаға айналды.
АЛМАТЫ