Премьер-министр Олжас Бектенов пен елімізге алғашқы ресми сапармен келген Болгария Президенті Румен Радев Мемлекет басшыларының келіссөздері барысында қол жеткізілген уағдаластықтарды іске асыру мәселелерін талқылады.
Кездесуде Олжас Бектенов Қазақстан Үкіметі жоғары деңгейде қол жеткізілген келісімдерді толық іске асыруға ниетті екенін айтты. Тараптар сауда-экономикалық, инвестициялық және көлік-логистикалық салалардағы ынтымақтастыққа айрықша назар аударды. Атап айтқанда, отандық органикалық ауыл шаруашылығы өнімдерінің өзара саудасын кеңейту мен оны қайта өңдеу және экспорттау, химия, қосылған құны жоғары тауарлар бойынша бірлескен кәсіпорындар құру мүмкіндіктері қаралды.
Ынтымақтастықты одан әрі арттырудың негізгі платформаларының бірі ретінде Транскаспий халықаралық көлік бағыты – «Орта дәлізді» дамыту мәселесі алға шықты. Сонымен қатар екі елдің бизнес-топтарының ақпараттық технологиялар, фармацевтика, туризм, сондай-ақ жалпы тәжірибе алмасу саласындағы инвестициялық өзара іс-қимылын ілгерілету перспективалары талқыланды.
Болгария Қазақстанның Еуропалық одақтағы ең ірі 15 сауда серіктесінің қатарына кіреді. Өткен жылы екіжақты тауар айналымы 375 млн долларға дейін артты. Қазіргі уақытта жаңа жұмыс орындарын ашу арқылы жалпы құны 117 млн доллардан асатын бірлескен жобалар пысықталып жатыр.