Облыстық тарихи өлкетану музейіндегі жәдігерлер қатарына бір ғасыр бұрын тігілген саптама етік қосылды. Бұл құнды дүниенің иесі кезінде белдескеннің бәрін жыққан атақты балуан Серәлі Дүйсенұлы болған деседі. ХІХ ғасыр соңында дүниеге келген балуанға етікті өз заманының айтулы қайраткері, Қаракөл-Қуаңдария болысын басқарған атақты Қара Жүргенұлы сыйлапты.
Облыстық тарихи-өлкетану музейінің мамандары ел ішінде бір әулеттің ғана мүлкі болып отырған осындай мұралар көп екенін айтады. Осыдан да музей бастамасымен 2017 жылдан бері «Жас өлкетанушы» жобасы қолға алынды. Музей жанынан өлкетанушылар үйірмесі жұмыс істей бастады. Музейлер күні аясында ғылыми жобаға қатысқан мектеп оқушыларының жұмысы сарапқа салынып, табылған жәдігер комиссия іріктеуінен өтеді.
«Ауыл-аймақтағы құнды жәдігерлерді жинақтайтын жобаға қатысушылар қатары жыл санап артып келеді. Былтыр жиналған 500-ге жуық жәдігердің 300-ін, биыл 200-ден астамын іріктеп алдық. Осы жылғы табысымыз Жалағаш ауданы Т.Жүргенов ауылындағы Ә.Оңалбаев атындағы №117 орта мектептің 7-сынып оқушысы Еркеназ Қуанышбек атты оқушының ғылыми жұмысына өзек болған осы саптама етік болып отыр. Жан-жақты зерттеу жүргізген ауыл мектебінің оқушысы Серәлі балуан туралы көп дерек жинапты. Ел аузындағы әңгімелерге қарағанда Серәлі Дүйсенұлы көрнекті мемлекет және қоғам қайраткері Темірбек Жүргеновтің әкесі Қара Жүргенұлының балуаны болған көрінеді. Қазір ғылыми қызметкерлер етікті зерттеп жатыр, алдағы уақытта экспозиция қатарынан орын алады», – дейді облыстық тарихи өлкетану музейінің бөлім меңгерушісі Еңлік Әбілқасымова.
Балуанға арнайы тігілген саптама етіктің қонышы тізені жабатындай ұзын әрі кең тігіліпті. Ішінде матамен астарланған киіз байпағы бар. Табаны мен өкшесі шегеленіп бекітілген. Етіктің табаны – 44, ал биіктігі – 46 сантиметр.
Көненің көзін көрген қариялар ертеде «Қараның балуаны» атанған Серәлінің ұсталығын да айтып отырады екен. Ұрпақтары қолында мәсі, етік тігіп, ер шапқан балуан жасаған асадал мен сандық та сақталыпты.
Өткен ғасыр ортасына дейін өмір сүрген Серәлінің етігі баласы Нағашыбекке қалыпты. Жауырыны жер иіскемеген балуанның талай жеңісінің куәгері енді музейдегі құнды жәдігерлер қатарын толықтырады.
Қызылорда