Шри-Ланканың астанасы Коломбо қаласында бокстан жастар арасында Азия чемпионаты аяқталды. Боксшыларымыз, әсіресе қыздар құрамасы 12 салмақтың барлығында алтын алып, құрлық үздігі атанды. Ерлер командасы да жалпы есепте топ бастап, елімізде ұлттық құраманың ізбасарлары қарымды екенін көрсетті.
19 жасқа дейінгі қыздар командасын баптайтын аға бапкер Жангелді Ахметовтің еңбегін баса айтқан ләзім. 12 салмақ дәрежесі бойынша сынға түскен қыздарымыздың барлығы да елге алтын медальмен оралды. 48 кг салмақта Айым Таңқыбаева үздік шықты. Сила Биболсынқызы (50 кг), Рахмина Әбдімежитова (52 кг), Жанел Имантаева (54 кг), Ақнұр Тұрсынғали (57 кг), Толғанай Қасымхан (60 кг), Алина Құдайгенова (63 кг), Ақбота Есімбекова (66 кг), Мария Сидоренко (70 кг), Құралай Егінбайқызы (81 кг), Сабина Жақсылық (81 кг салмақтан жоғары) құрлық үздігі атанды.
Шри-Ланкада өткен додаға Мақсат Бақтыбазар баптап барған 19 жасқа дейінгі жастарымыз (ерлер) 10 алтын, 1 күміс, 1 қола медаль еншіледі. Нұрхан Құмарбеков (48 кг), Досымжан Таңатар (51 кг), Алдияр Бахадүр (54 кг), Нығман Нығмет (57 кг), Әділет Тартубек (60 кг), Мұхит Нұрқабылұлы (63,5 кг), Сұлтан Тұрдалы (67 кг), Игорь Соловьёв (80 кг), Расул Асанханов (92 кг), Бексұлтан Қайратұлы (+ 92 кг) Азия чемпионатының алтынын олжалады. 75 кг салмақта сынға түскен Жасұлан Бердалы финалда сүрініп, күміс медальды місе тұтты. 86 кг салмақ дәрежесінде Нұрсұлтан Қыстаубайға қола медаль бұйырды.
Азия чемпионатын 22 жасқа дейінгі жастар жалғастырып, жеңістің жүлдесін жақсарта түсті. Бейжің Олимпиадасының чемпионы Бақыт Сәрсекбаев баптап әкелген өрендер сенімді ақтай білді. Тілеуберді Сүлеймен (48 кг), Диас Берікбай (51 кг), Жасурбек Анорбаев (57 кг), Нұрислам Қалдыбаев (60 кг), Бақтияр Анарбаев (67 кг), Ағажан Қадыр (71 кг), Аман Қонысбеков (75 кг), Бақберген Әлиасқаров (80 кг), Ибрагим Бетаев (86 кг), Азатбек Жолдасхан (92 кг) алтын алса, Сералы Жолмағанбет (63,5 кг) мен Ерсұлтан Сапар (+92 кг) күміс жүлде иеленді.
22 жасқа дейінгі боксшы қыздарымыз да Шри-Ланкадан олжамен оралды. Элина Базарова (54 кг), Виктория Байдукова (57 кг), Анар Тұрсынбек (60 кг), Аружан Жаңабаева (63 кг), Ұлдана Таубай (66 кг), Бақыт Сейдіш (70 кг), Шұғыла Нәлібай (75 кг), Жібек Жарасқызы (81 кг), Әсел Тоқтасын (+81 кг) әнұрамызды шырқатты. Финалдық тартыста есе жіберген Ақбота Болат, Гүлнар Тұрапбай, Томирис Мырзақұл күміс медальды місе тұтты. 22 жасқа дейінгі боксшы қыздарды білікті бапкер Елдос Сайдалин бастаған бапкерлер ұжымы бастап әкелді.