• RUB:
    6.35
  • USD:
    514.5
  • EUR:
    582.67
Басты сайтқа өту
Саясат Кеше

Мажарстан Мемлекеттік жиналысымен байланыс нығая түседі

70 рет
көрсетілді

Мәжіліс төрағасы Ерлан Қошанов Мажарстан Мемлекеттік жиналысының Қазақстанмен ынтымақтастық жөніндегі тобының жетекшісі Шандор Фазекаш бастаған делегациямен кездесті.

Мажар депутаттарын қарсы алған Ерлан Қошанов Қазақстан мен Мажарстанды берік страте­гиялық серіктестік байланыстыратынын атап өтті.

– Қазақстан Еуропалық одақтағы стратегиялық әріптесі­міз Мажарстанмен тығыз ынты­мақтастықты жоғары бағалайды. Бауырлас елдерімізді тәуелсіздік, татулық пен ұлттық мәдениеттің ортақ құндылықтары біріктіреді. Ортақ тарихи мұрамыз жеміс­ті диалог пен сан саладағы ықпалдастыққа арқау болып келеді. Біздің көшбас­шыларымыздың арасындағы сенімді қарым-қатынас – осының кепілі. Президентіміз Қасым-Жомарт Тоқаевтың 2024 жылғы қарашада Будапешт қаласына жасаған алғашқы мемлекеттік сапары стратегиялық әріптестігіміздің 10 жылдығымен тұспа-тұс келуінің символдық мәні бар, – деді Мәжіліс төрағасы.

Ерлан Қошанов Мәжіліс Мажарстан Мемлекеттік жиналыспен парламентаралық байланысты дамытуға үлкен мән беретінін баса айтты. Өткен жылы Будапешт қаласына сапар барысында екі ел парламенттері ара­сын­дағы ынтымақтастық туралы келісімге қол қойылып, екіжақты қарым-қатынасты дамытуға берік негіз болды. Сондай-ақ палата спикері мажар депутаттарының Қазақстанмен парламентаралық достық тобы аясындағы белсенді жұмысына назар аударып, Шандор Фазекашты Қазақстанмен достық тобының төрағасы болып сайлануымен құттықтады.

Өз кезегінде Шандор Фазекаш мажар қыпшақтарының қазақ халқына ыстық сәлемін жеткізді. Оның айтуынша, қазір олар Мажарстанда 50-ге жуық елді мекенде тұрып жатыр әрі ата-бабаларының тарихи отанымен байланысын ерекше бағалайды.

– Бізге түп-тамырымыздың бір болуының мәні зор. Осы деректі, осы мұраны болашақ ұрпаққа жеткізуге тырысамыз. 1990 жылдан бастап тарихи байланысымызды қайта орнатып, елдеріміз бен халықтарымыз арасындағы қарым-қатынасты қалпына келтіре бастадық, мұны шынымен жоғары бағалаймыз. Мажар қыпшақтары және бүкіл мажар халқы үшін Қазақстанның тәуелсіз ел болуы маңызды. Қазір өркендеген мемлекетке айналып келе жатыр. Соның арқасында біз дипломатия, экономика және мәдениет салаларында берік байланыс орната алдық, – деді Мажарстан делегациясының басшысы.

Тараптар ауыл шаруашылығы, экология, мәдени-гуманитар­лық бағыттарда ынтымақтастық­ты дамыту перспективаларын талқылады.

Мәжіліс төрағасы елдеріміз­дің Түркі мемлекеттері ұйымы мен ТүркПА аясындағы жемісті ықпал­дастығын, Еуропа Кеңесі Парламенттік Ассамблеясы және басқа да көпжақты құрылымдар аясында мажар әріптестермен байланысты дамытудың маңыздылығын атап өтті.

Кездесу соңында Ерлан Қошанов Мемлекет басшысы Қасым-Жомарт Тоқаевтың атынан Қазақ­стан мен Мажарстан ара­сын­дағы достық пен ынтымақтас­тықты нығайтқаны үшін Шандор Фазекашқа II дәрежелі «Достық» орденін табыс етті.