Ізгілік дәнін сепкен «Қамқорлық»

Денсаулық сақтау ми­нистрлі­гінің мәліме­тінше, дамуы кешеуіл­деген балалар саны 2019 жылы 6 706 болса, 2023 жылы 10 945-ке дейін көбейген. Өткен жылы  Ал­маты қаласында 18 жасқа дейін­гі ерекше балалар саны 9 526-ға жетсе, олардың ішінде үш жасқа дейінгі балалар саны шама­мен 800-дей болған. Бұл бала­лардың тілі кеш шығады, қара­пайым тапсырмаларды қабылдай алмайды, қатарымен араласуы да қиын, сөйтіп, өсе келе қо­ғам­ға бейімделе алмайтыны белгілі.

Еңбек және халықты әлеумет­тік қорғау министрлігінің мәліме­тінше, туабітті, тұқым қуалайтын кеселдер салдарынан, әлеуметтік факторлардың кесірінен кейінгі үш жылда мүгедектігі бар балалар саны 11,4%-ға артқан. 2024 жылы елдегі мүгедектігі бар адамдардың жалпы саны шамамен 732 мыңға жетсе, олардың 15%-ы – 7-18 жас аралығындағы балалар.

Әлбетте, ерекше бала бағып отырған ата-аналарға қоғамның қолдауы, мамандардың кәсіби көмегі қажет. Сол тұрғыда Алма­тыда «Қамқорлық» атты ерекше күтімді қажет ететін балаларға арналған алғашқы бейімдеу және даму орталығы ашылды. Орталық дамуында ауытқушылығы бар балдырғандардың кеселін ерте бас­тан емдеп,  оңалтуды көздейді.

Жаңа орталық 2024 жылдың желтоқсанында күрделі жөндеу­ден өткен Перинатология және ба­лалар кардиохирургиясы орта­лығының базасында құрылған. Алматы әкімдігі мен «Қазақстан халқына» қоры мұрындық болған бірегей жоба медициналық көмектен бөлек, түрлі әлеуметтік қолдауларды да қамтиды. Мұнда балалардың үйлесімді өсуі мен бейімделуіне жағдай жасалған. Оларға абилитация (жаңа дағды­ларды дамыту), когнитивті, мо­тор­лық, коммуникативті қабіле­тін дамытуға арналған оқыту жүргізіледі.

Орталықтағы 426 шаршы метр аумақта бірегей терапев­тік кеңістік қарастырылған: шунгит және тұзды бөлмелер, сенсор­лық қабылдауды жақсартуға арналған иммерсиялық ванна, сен­сорлық бөлме бар. Балалар­ды оңалтуға арналған жеке бағдар­ламаларды көпсалалы мамандар тобы әзірлейді. Олардың қата­­рына невролог, реабилитолог, неонатолог, физиотерапевт, ЕДШ дәрігері, логопед, дефектолог кіреді. Орталық күніне 50 бала қабылдай алады, жы­лы­на 600 балаға міндетті әлеу­мет­тік медициналық сақтан­дыру (МӘМС) аясында көмек көрсетілмек.

Қала әкімі Ерболат Досаев ор­та­лық­тағы құрылыс жұмыс­тарының сапасын арнайы ба­рып көріп, мердігерге анықталған кемшіліктерді жоюды тапсырып, орындалуы қадағаланатынын ескертті. Әкім сондай-ақ жаңар­тылған Перинатология және ба­лалар кардиохирургиясы орта­лығы емханасының жұмысы­мен танысты. 1966 жылы салынған 1300,6 шаршы метрлік екі қабат­ты ғимаратта күрделі жөн­деу жүргізіліп, инженерлік жүйе­лер жаңғыртылды. Медицина­лық қызметті жылдам көрсе­ту үшін пациенттердің бағы­ты оңтайландырылып, мүм­кін­­дігі шектеулі азамат­тар­дың қол­же­тімділігі артты. Атап айт­қанда, емхананың кеңіс­тігі аймақтарға бөлініп, кабинет­тердің орналасуы қайта қаралды, бұл баспалдақпен көтерілу немесе лифт пайдалану қажеттілігін азайтты.

Алматы әкімі ерекше назар аударған нысанның бірі – емхана базасында орналасқан Ұрық қорғау орталығы. Мұнда туабіткен даму кемістіктерін перина­талды диагностикалау, оларды түзетуге арналған жатыр­ішілік операциялар жасалады. Бұл – Алматы әкімінің тапсырмасымен, Денсаулық сақтау министрлігінің қолдауымен 2024 жылғы 13 маусымда іске қосылған фетальды хирургияның ерекше жобасы. Жыл сайын мұнда 8 мыңнан астам жүкті әйел ультрадыбыстық тексеруден өтеді.

Қала басшысы Перинато­логия және балалар кардиохирургиясы орталығының одан әрі дамуы жоспарланып отырғанын атап өтті. Оның ішінде «Ақылды» операциялық бөлмелер құру, жылдық қабыл­дауды 17 500-ден 19 500 адамға дейін арттыру, жүрекке жасалатын хирургиялық операциялар­ды қосқанда, операция түрлерін көбейтіп, акушерлік операция­лар санын жылына 3 500-ден 4 500-ге дейін арттыру қарасты­рылған.

Қазірде Перинатология және балалар кардиохирургиясы ор­талығы – әйелдер мен балаларға толық циклді медициналық қыз­мет көрсететін ірі кластер. Оның әрі қарай жаңғыртылуы жатыр­ішілік операциясын кеңейтуге мүмкіндік береді, сондай-ақ даму кемістіктерінен болатын мүгедектік пен нәресте өлімін 35%-ға төмендетуге ықпал етеді.

Айта кетейік, Перинатология және балалар кардиохирур­гия­сы орталығында жүргізілген күрделі жөндеу жұмыстары – «Ал­маты қаласын 2025 жылға дейін дамыту бағдарламасы және 2030 жыл­ға дейінгі ортамерзімді келешегі» аясындағы маңызды жұмыстардың бірі. Ғимараттың жалпы ауданы – 24,1 мың шаршы метрді алып жатыр.

АЛМАТЫ