«Ekin patrol» ереже елемегенді аямайды

Облыстық полиция департаментінде бақылау камерасы барынша көп мұндай патруль көлігінің саны 11 еді. Биылдан бастап тағы 17 «ekin patrol» жолға шықты.

Бұл ақылды полицей көлігі көбіне республикалық маңызы бар Қарағанды-Балқаш, Қарағанды – Жезқазған, Астана – Қарағанды бағытында және Қарағанды – Қарқаралы, Теміртау, Шахтинск тасжолдарында жүреді.

– Былтыр 15 мыңнан аса құқық бұзу­шылық тіркелді. Биыл ақылды патруль көлігі тіпті көбейді. Тоғыз камералы кешен көлік үстіндегі түрлі-түсті жарқылдатқыш құрылғысына орнатылған. Жол апаты көбіне жылдамдықты шектен тыс асырудан орын алады. Бұған қоса жолдың қарсы бетіне шығып кететіндер де көп. Мұндай ақылды кешенді орнатуымыздың басты мақсаты – сол жол-көлік оқиғаларының алдын алу, – дейді облыстық полиция де­партаменті әкімшілік полиция басқар­масының аға инспекторы Рүстем Әденов.

Ережені елемейтіндер әлі де жетіп артылады. Қаладағы көлік қозғалысын бақы­лайтын қырағы камералар көбейсе де көлік апаты азаймай тұр. Облыстық полиция департаменті бастығының бірінші орынбасары Жасқайрат Қайыров жыл басталғалы бері облыс жолдарында 44 жол-көлік оқиғасы тіркеліп, 5 адам қаза тауып, 58 адам түрлі жарақат алғанын айтады. Соның алдын алу үшін ақылды кешен орнатқан патруль көлігінің санын көбейтіп отыр.

«Ekin patrol» деп аталатын бұл жүйе – айналасына «мен келе жатырмын» деп белгі беретін жарқылдатқышқа орна­тыл­ған «ақылды» қондырғы. Оның камерасы 360 градусқа дейін шолып, өзінен 70 метрге дейінгі қашықтағы автокөліктің нөмірін жазып алады. Көлік үстіндегі «ақылды» камералар автоматты және нақ­ты уақыт режімін­де бірдей жұмыс іс­тей­ді. Жол тәртібінің бұзылғаны туралы мә­ліметтердің бәрін жүргізушінің қаже­тінсіз бірден дерек­қорға жіберіп отырады.

– Бақылау жүйесі алды-артындағы жылдамдық мөлшерін асырған машиналарды жазып алып отырады және іздеудегі автокөліктерді анықтайды. Радары 120 метрге дейінгі радиуста жұмыс атқарады. Бұған қоса 70 метрге дейінгі көліктерді анық көре алады, – дейді Р.Әбенов.

Аға инспектордың айтуынша, жаңа патруль жол бойында дұрыс тұрмаған кө­лікті де, жолдағы жолақтан асып кеткен немесе қызыл белгіге өтіп кеткен көлік­ті де «шарт» еткізіп түсіріп алады. Жыл­жы­ма­лы бақылау жүйесінің басқа камералар­дан басты ерекшелігі – қаланың кез келген көшесінде тәулік сайын кезекшілік етеді.

Енді жол ережесін өрескел бұзатындар азаяды. Айтпай келген айыппұлға қалта­сын кім қақтыра берсін? Көлік жүргізу­ші­лердің көбі жол бойындағы бір орында ілі­ніп тұрған камералардың жанынан өт­кенде ғана ереже сақтайды, ал жылжы­ма­лы камера кез келген жерде абайлап, ере­жені барынша ескеріп жүруге үйретеді.

Қарағанды облысының полиция депар­таменті бастығының бірінші орынбасары Жай­қайрат Қайыровтың айтуынша, осы жылды Ішкі істер министрлігі «Профи­лактика жылы» деп бекітіпті. Соған орай Қара­ғандыда жол қауіпсіздігін қадағалау мақса­тында түрлі іс-шара үздіксіз өтіп тұрады.

– Жол қозғалысын үнемі қадағалау үшін полиция департаменті ақпан айында «Қауіпсіз жол» республикалық жедел-профилактикалық іс-шарасын өткізді. Іс-шара кезінде облыс жолдарында полиция жасақтарының саны артып, тәртіп сақшылары рейд жүргізді. Мұндағы мақ­сат – көлік құралдары иелерінің тәр­тіп­ті сақтауы. «Заң мен тәртіп» қағи­да­тын баршамыз ұстануымыз керек. Полицияның жұмысына енгізіліп жатқан жаңашылдықтар халық­тың тыныштығы мен қоғам қауіпсіздігін тиіс­ті деңгейде қамтамасыз етеді. Қабылдан­ған шаралар жол-көлік оқиғаларының санын азайтуға септігі тиеді. Патрульдік мін­дет­терді оңтайландыру арқылы құқық қор­ғау органдары қызметкерлерінің жұмы­сы жаңа деңгейге көтеріледі. Сондай-ақ полиция қызметін автоматтандыруға, полиция жұмысын бақылауға, деректерге қолже­тімділікті, басқарушылықты, диспетчерлеуді жақсартуға көмектеседі. Ал тәртіп сақшы­лары өз кезегінде халық­тың мүддесіне адал қызмет етеді, – дейді Ж.Қайыров.

Қарағанды облысы