Бүгінде баспана алу үшін жылдар бойы үй кезегінде тұрған адамдар қалада ғана емес, ауылдық жерлерде де көп. Сондай қолжетімді баспанаға қол жеткізе алмай жүрген көпбалалы әрі жалғызілікті ананың бірі – Саянгүл Қалқашова. Жарма ауданы, Қаратөбе ауылдық округі Әди (осы ауылда туған майдангер жазушы, филология ғылымдарының докторы Әди Шәріповтің құрметіне қойылған атау) ауылының тұрғыны екен.
Күміс алқа иегері С.Қалқашованың айтуынша, үй кезегіне 2000 жылы тұрыпты. Табаны күректей 25 жыл. Кезегін ширек ғасыр табан аудармай күткен ананың алты баласы бар, күйеуі 2022 жылы дүниеден өткен. Бір баласының көру қабілеті төмен, бірақ мүгедектігін әлі ала алмаған. Бүгінде балалардың үлкен екеуі кәмелет жасынан асқан. Қызы тұрмысқа шығып, үлкен ұлы анасы мен бауырларына көмектесемін деп оқуын тастап, жұмыс істеп кеткен.
Сонымен 25 жыл өтсе де, үй кезегінде өзгеріс жоқ, керісінше кезегі шегеріле берген. Тіпті 2021 жылы, кейін 2023 жылы желтоқсан айында кезекке тұрған. Бірақ тіркегені де есепке алынбай, 2024 жылдың желтоқсанында кезекке қайта тұруға мәжбүрлеген көрінеді.
– 2024 жылы желтоқсанда үй кезегіне тағы тұрдым. Қазір, міне, кезекте тоқсаныншымын. Маған аудан әкімінің өзі сол кезде бір-екі айдың ішінде үй аласыз деген. Алайда екі ай түгілі, алты ай өтті. Алты ай ішінде әкімге тағы да үш рет бардым. «Сізге үй жоқ емес, бар, аласыз» дейді де, шығарып салады. 9-сынып бітірген балам екі жылдан кейін 18 жасқа толады. Содан соң кәмелетке толмаған үш балам ғана қалады. Онда маған талап бойынша үй берілмейді, – дейді С.Қалқашова.
Саянгүл секілді қаншама ананың жылдар бойы сарыла күткен пәтеріне кезегі енді келе бергенде, не жасы зейнеткерлікке жетіп, не балалары кәмелетке толып, баспана көзден бұлбұл ұшатыны жасырын емес.
– Қазір үйімдегі пешім құлап тұр. Не көмектесетін адам жоқ. Жанымда отырған туыс-туғаным да жоқ. Әкем өмірден озып кетті, шешеміз сексенге келді. Ол кісінің өзіне көмек керек, – деп көпбалалы ана мұңын шақты.
«Ауылдан неге көшкілеріңіз келеді?» деп сұрадым. Жалғызілік ана ауылдың болашағына сенбейді. «Өйткені ауылда қазір елудей түтін қалған, мектептің өзі әрең тұр. Бір сыныпта бір бала оқиды. 9 сыныпқа дейін ғана. Не байланыс жоқ, жан-жақпен сөйлескісі келетін жұрт осылай желі қуалап тауда жүреді», дейді.
Абай облысы
