Мемлекет басшысы Қасым-Жомарт Тоқаев Ассамблеяның былтырғы «Бірлік. Жасампаздық. Өрлеу» атты сессиясында «Қазақ тілі уақыт өте келе этносаралық қарым-қатынас тіліне айналады» деген еді. Байқап бағдарласақ, қоғам біртіндеп осыған келе жатыр. Мұны қазіргі кең таралған үрдіске, осы бағытта жасалып жатқан саяси қадамдарға қарап аңғаруға болады. Әрине, бұл ретте ҚХА-ның рөлі айрықша. Ұйым мемлекеттік тілді ілгерілетіп қана қоймай, ел азаматтарын ортақ құндылық аясында ұйыстыруда, қоғамдық келісім мен бірлікті нығайтуда ауқымды жұмыс атқарып отыр.
Оның бірі әрі бірегейі – қазақ тілінде жатық жазып, еркін көсілетін жастардың басын қосқан «Мың бала» жобасы. 2015 жылы іске қосылған бастама мемлекеттік тілді меңгеруді міндеттеуден гөрі, өзің үлгі болсаң, айналаң да бой тіктейді деген ұстанымды алға тартады. Бұл ойды күні бүгінге дейін 3 млн-ға жуық өзге этнос өкілі қолдап, жобаға қатысты.
Сол ұлттық өнерді ұлықтап жүрген жастардың арасында ақтөбелік Александра Погорелова да бар. «Мың бала» жобасының 13 жастағы жеңімпазы жетіген аспабында кәсіби деңгейде ойнап, қазақ әндері арқылы халқымыздың рухани мұрасын дәріптеп жүр.
– Жоба поэзия, бейнероликтер жарысы, тіл үйретудегі авторлық бағдарламалар, шешендік оқулар сынды түрлі бағыт-бағдарды қамтитын байқаулардан тұрады. Мен жетігенде ойнап, өнер көрсеттім. Өзге қатысушылар да – өз өңірінде бас жүлде иеленген кіл мықтылар. Қатарымызда өлең жазатын қабілеті бар, суырыпсалма жас ақындар, сондай-ақ қазақ шайырларының өлеңдеріне ән жазатын сазгер дарынды жастар болды. Біразымен жақын дос болып араласып кеттік. Бастысы, жоба қазақ халқының салт-дәстүрін тереңінен меңгеруге, поэзиясына деген қызығушылығымды арттырды, – дейді А.Погорелова.
2015–2024 жылдар аралығында аталған жоба аясында елімізде 125 мыңнан аса іс-шара ұйымдастырылған. «Мың бала» жобасының өңірлерде өтетін биылғы іс-шаралары қазақтың ұлы ақыны Абай Құнанбайұлының 180 жылдығына, халқымыздың біртуар перзенті, күйші Нұрғиса Тілендиевтің 100 жылдығына арналады.
– Былтыр өңірлерде мұғалімдер арасында қазақ тілін жедел оқытуға бағытталған инновациялық «Тілім – тірегім» атты әдістеме конкурсы, шешендік өнерді дамытуға ықпал ететін, мемлекеттік тілде сөйлеу дағдыларын жетілдіретін «Өнер алды – қызыл тіл» атауымен тренинг, курстар, балабақша, мектеп пен жазғы лагерьде ұлттық, спорттық ойындар, конкурстар мен викториналарды қамтитын «Жүзден жүйрік, мыңнан тұлпар» ойын алаңы, «Өнерлі өрге жүзер» музыкалық байқауы ұйымдастырылды. Қазақстан халқы тілдері күніне арналған жалпы республикалық ашық диктант өтті. Сондай-ақ әлеуметтік желілерде #Мыңбала2024 хештегімен ақын Сәкен Сейфуллиннің 130 жылдығына орай шығармаларын оқудан челлендж жарияланды. Осылайша, жоба жастардың ұлттық рухты сезінуіне, ең бастысы, бірлік пен татулықты терең түсінуіне жол ашты, – дейді Мәдениет және ақпарат министрлігі ЭҚДК «Қоғамдық келісім» РММ қызметкері Үмбігүлсім Ахметжанова.
Былтыр жобаның «Өнерлі өрге жүзер» музыкалық байқауының жеңімпаздары дәстүр бойынша Астанаға арнайы шақырылып, Қазақстан халқы Ассамблеясының, Мәдениет және ақпарат министрлігінің дипломдарымен, бағалы сыйлықтармен марапатталды. Сол концертте «Мың бала» жобасының жеңімпазы Зарина Эргашбекова өз өлеңдерімен жұртты тәнті етті.
– Ұлтым – өзбек. Түркістан облысының Сайрам ауданында дүниеге келіп, қазір Павлодар облысында тұрып жатырмын. Ата-анамның шешімімен қазақ сыныбына бардым. Соның арқасында бүгінде қазақ тілінде еркін сөйлеймін, ойлаймын, тіпті ішкі жандүниемді қара өлеңмен жеткіземін. Жобаға поэзия бағыты бойынша қатысып, 4-5 авторлық туындымды ұсындым. Осы жоба маған ерекше шабыт сыйлады. Бірлік пен татулықтың қадірін терең сезіндім, – дейді жас ақын.
Демек «Мың бала» – жай ғана жоба емес, бұл жүректерді жақындастырып, түрлі этнос өкілдерін бір ту астына біріктірген алаң. Ал тіл – тек қарым-қатынас құралы емес, тұтас бір халықтың жан-дүниесін жеткізетін рухани байлық.
