Әдебиеттануға, әсіресе көркем әдебиетке, мәдениеттануға, көсемсөзге, тарихқа да қызмет еткен көне грек алыптары тәрізді тұлға еді. Оның ұлы жүрегі соғып тұрғанда, біз алаңсыз жүретінбіз. Алдымызда Мағауин тұр деген үлкен сенім бар еді. Арқасүйер алып бәйтерегіміз, асқар тауымыз құлады.
80-жылдары жарияланып, Мемлекеттік сыйлыққа ие болған «Аласапыран» атты тарихи романы – қазақ әдебиеті түгілі, әлем әдебиетіндегі кесек шығарманың бірі. Мағауиннің қазасы өлім емес, ол осыған дейін жазған туындыларымен әлем классиктерінің қатарына қосылды. Тырнақалды шығармалары «Тіленші», «Қара қыз», «Көкмұнар», «Тазының өлімі» сынды тағы басқа еңбектерінің қай-қайсысы – классикалық туындылар. Сондықтан біз бүгін Мағауин тұлғасымен емес, қазақ әдебиетінің алып дәуірімен қоштасып отырмыз.
Былтыр жыл соңында бізге асығыс қоңырау шалып, пікірін білдірді. Неге асыққаны енді түсінікті болды. Шығармашылық туралы жаңа ойын ортаға салып үлгерді. Ауыр сырқаты байқалып тұрды.
Ол Эрнест Хэмингуэй, Герман Мелвилл, Лев Толстой, Томас Манн, Альбер Камю, Жан Поль Сартр сынды алыптардың қатарында тұр. Сондықтан бұл – жалғыз қазақ әдебиетінің қайғысы емес, әлем әдебиетінің қазасы.
Дидар АМАНТАЙ,
жазушы
