Maqsut Narikbayev University 2 докторанты, 2 магистранты Германияда тағылымдамадан өтеді. Олар Германиядағы мемлекеттік басқару саласындағы маңызды істерге қатысып, тәжірибе жинайды. Жоба жетекшісі, заң ғылымдарының докторы, профессор Роман Мельниктің айтуынша, мұндай мүмкіндік өзара тығыз байланыстың арқасында жүзеге асып отыр.
– Maqsut Narikbayev University неміс серіктестерімен үнемі байланыста әрі студенттердің, докторанттардың, оқытушылардың білімін жақсартуда бірлесе жұмыс істейді. Бұл жоба да осындай жүйелі қарым-қатынас нәтижесінде жүзеге асты. Германиядағы серіктестеріміздің ынтымақтастықты жақсартуға, жаңа тәжірибелерді сынап көруге әрқашан ашық екенін атап өткім келеді. Бүгінде неміс қорлары да, неміс университеттері де, жалпы, Германия біздің елімізді білім мен ғылым саласындағы сенімді әрі тұрақты әріптесі ретінде қарастырады. Сондықтан бастамаларымызды іске асыруға үнемі қолдау көрсетеді, – деді Р.Мельник.
Біздің Германиядан үйренеріміз көп. Өйткені әкімшілік құқық саласындағы неміс тәжірибесі заң саласындағы озық үлгі ретінде есептеледі. Мысалы, елімізде жеке тұлғаларға заңсыз келтірілген залалды өтеу туралы мәселе әлі шешілген жоқ. Сондай-ақ жергілікті өзін-өзі басқару институттары әлі де жетілдіруді қажет етеді. Ал осы жағынан Германия өте тәжірибелі мемлекет.
Тағылымдамадан өтуге мүмкіндік алғандардың бірі – Әділхан Ілдебаев. Оның айтуынша, бұндай тағылымдама дамыған Еуропа елдеріндегі бюрократиялық үдерістердің қалай жұмыс істейтінін қарастыруға мүмкіндік береді. Сонымен қатар екінші тарап та біздің еліміздегі әкімшілік құқықтық жағдайдың қандай екенін білуге мүдделі.
– Бұл тағылымдама Германияның заң саласындағы көп жылдық тәжірибесін ескере отырып жүзеге асырылды деп айтуға болады. Онда мен неміс шенеуніктерінің әкімшілік актілерді қабылдауға қалай қарайтынын, қандай шешім қабылдайтынын, қандай әдістермен жұмыс істейтінін көріп, біліп, үйренемін. Алған тәжірибемді өз еліміздегі әкімшілік құқық саласын дамытуға пайдаланатын боламын, – деді Maqsut Narikbayev University студенті Әділхан.
Заң ғылымдарының докторы, профессор Роман Мельниктің айтуынша, студенттердің практикалық дағдыларды игеруінің ең жақсы түрі ол – тағылымдама.
– Менің ойымша, егер біз өзгерісті қаласақ, мемлекеттік билікті ұйымдастырудың барлық заманауи тәжірибелерін зерттеп, оларды енгізу мүмкіндігін қарастырып, ұлттық, тарихи, экономикалық ерекшеліктерімізді ескере отырып жүзеге асыруымыз қажет. Осы тұста мәселелерді шешудің жаңа тәсілдерін таба алатын, оны дамытып енгізе алатын жас, білімді, шығармашыл тұлғалар қажет. Мұндай жобалар біздің жастарымызға жаңа жол ашады, оларға басқа елдермен байланыс орнатуға мүмкіндік береді, – дейді әкімшілік және неміс құқығы ғылыми мектебінің жетекшісі Роман Мельник.
