Қазақстан мен Әзербайжан президенттерінің шағын және кеңейтілген құрамдағы кездесулерінде екі елдің стратегиялық әріптестігін дамытудың негізгі мәселелері сөз болды.
Ильхам Әлиев кортежінің Ақордаға келуі және Мемлекет басшысы Қасым-Жомарт Тоқаевпен кездесуі Жібек жолы телеарнасының тікелей эфирінде көрсетілді. Естеріңізге сала кетейік, Әзербайжанның мемлекет басшысы Астанаға Душанбедегі сапарынан кейін барып, «Парсы әлеміне түркі көпірін салуға» атсалысты.
Транскаспий сауда жолының тиімділігі артады
Қазақстан президенті Қасым-Жомарт Тоқаев пен Әзербайжан президенті Ильхам Әлиев Түркиядан басталып, Орталық Азия арқылы Қытайға дейін созылатын Транскаспий халықаралық көлік бағытындағы Орта дәліз жобасын тиімді жүзеге асыру туралы келісімге келді.
Қ.Тоқаев Каспий теңізі арқылы көршілес Әзербайжанмен Орта дәліздің әлеуетін толық пайдалану маңызды екенін атап өтіп: «Орта дәлізді дамытудың 2022-2027 жылдарға арналған жол картасын тиімді жүзеге асыру да маңызды болып отыр. Біз оны толық пайдалану және инфрақұрылымды дамытуға үшінші елдерді тарту қажет деп келістік», деді.
Осылайша, Түркия, Әзербайжан, Қазақстан және Грузияның сыртқы істер және көлік министрлері Орта дәлізді дамыту бойынша 2022-2027 жол картасына қол қойды.
Тоқаевтың Әлиевпен кездесуі барысында «тараптар саяси, сауда-экономикалық, көлік-транзиттік және мәдени-гуманитарлық ынтымақтастықты нығайтуға ерекше назар аударып, Қазақстан-Әзербайжан стратегиялық серіктестігі мен одақтастығының негізгі мәселелерін талқылады.
«Әзербайжан – біз үшін жай ғана маңызды және сенімді серіктес емес, бауырлас әрі жақын мемлекет. Біз көпғасырлық достық пен өзара қолдаудың мызғымас байланыстарына сүйене отырып, бүгінде ынтымақтасу рухында дамып келе жатқан тиімді мемлекетаралық ынтымақтастықты құрдық», деді Қ.Тоқаев.
Келіссөздер қорытындысы бойынша Қ.Тоқаев пен И.Әлиев бірлескен мәлімдеме жасады. Сондай-ақ екі елдің Жоғары мемлекетаралық кеңесін құру туралы хаттамаға және алты меморандумға қол қойылды.
«Баку – Тбилиси –Жейхан» болашағы
Әзербайжан президенті Ильхам Әлиевтің Қазақстандағы сапары барысында бірқатар экономикалық мәселе талқыланып, келіссөздер жүргізілді.
Қазақстан президенті Қасым-Жомарт Тоқаев екі ел арасында «белсенді және сенімді саяси диалог» қалыптасқанын және көпжақты платформалар аясында «конструктивті өзара іс-қимыл» үйлесім тапқанын атап өтті. Сондай-ақ Қ.Тоқаев: «Қазіргі кезеңдегі басты міндетіміз – энергетикалық ресурстарымызды әлемдік нарықтарға тасымалдауды әртараптандыру», деп осы саладағы басты бағытқа тоқталды.
Қазақстан биылдан бастап мұнайын «Баку – Тбилиси – Жейхан» құбыры арқылы тасымалдай бастады. БTД құбыры Грузияның астанасы Тбилиси арқылы Әзербайжанның астанасы Баку мен Түркияның Жерорта теңізінің оңтүстік-шығыс жағалауындағы Жейхан портын байланыстыратын 1 768 шақырымдық (1099 миль) құбыр екенін айта кеткен жөн. Мұнай Жейхан портына тасымалданады, осы жерден әлемдік нарыққа шығарылады.
Сондай-ақ кездесуде Қ.Тоқаев пен И.Әлиев екі елдің сауда-экономикалық ынтымақтастығы артқанын атап өтті. Мәселен, екіжақты тауар айналымының көлемі 40 пайызға артып, 500 миллион долларға жетті. Қ.Тоқаев алдағы уақытта бұл көрсеткішті 1 миллиард долларға дейін арттыруға болатынын айтты.
Астанадағы Гейдар Әлиев көшесі
Астанада Әзербайжанның бұрынғы президенті Гейдар Әлиевтің атына көше берілді. Оның ашылуына Қазақстан және Әзербайжан президенттері қатысты.
«Елдеріміздің шынайы достығы мен өзара қолдауының тағы бір айқын дәлелі – қазақ халқының Әзербайжанға тартуы – Физули қаласындағы Құрманғазы атындағы балалар шығармашылық орталығы. Менің ойымша, бұл маңызды нысан жақын арада жұмыс істей бастағанының куәсі боламыз», деді Қ.Тоқаев.
Ал И.Әлиев болса Қ.Тоқаевқа Астанаға шақырғаны үшін ризашылығын білдіріп, екі елдің қарым-қатынастары, әсіресе гуманитарлық саладағы ынтымақтастық арқылы нығайтып жатқанын атап өтті.
