Суретті түсірген Ерлан ОМАР, «ЕQ»
Көрменің ашылуына Ақпарат және қоғамдық даму министрі Дархан Қыдырәлі, Н.Назарбаев орталығының басқарма төрағасы Болат Сәрсенбаев, Парламент Сенатының депутаты Бибігүл Жексенбай, Астана қаласы Суретшілер одағының төрағасы Өмірәлі Ысмайылов, Тұңғыш Президент кітапханасының директоры Бақытжан Темірболат, «Қоғамдық келісім» орталығының директоры Элина Паули, «Отандастар» қоры КеАҚ президенті Абзал Сапарбекұлы қатысты. Бұған қоса мерекелік іс-шараға халықаралық ұйымдар мен ғылыми-сарапшылық қоғамдастықтың, Қазақстанның діни бірлестіктерінің, бұқаралық ақпарат құралдарының, Қазақстандағы шетелдік дипломатиялық өкілдіктердің басшылары шақырылды.
– Әйел – сұлулықтың символы. Біздегі әдемі әшекейлер мен зергерлік бұйымдар қыздармен, аналарымызбен байланысты. Түркі халықтарының мұрасы бір-біріне ортақ болғандықтан, зергерлік өнердің барлығы да біздің халықтарымызға ортақ мұра. Сол сияқты Үндістандағы Тәж Махалды да аналарымызға арнап салдырған. Алаша, текемет, түскиіз, кілемнің түр-түрін аналарымыз керемет ою-өрнектермен жасаған. Әлемдегі алғашқы кілемнің біздің аналарымыздың қолынан шыққанын мақтаныш тұтамыз. Бүгінгі көрмеден соны байқауға болады. Жалпы, нәзік жандардың сұлулығы мен әсемдігі әдебиеттің, қолөнер мен зергерлік мәдениеттің дамуына арқау болған, – деді жиындағы сөзінде Дархан Қыдырәлі.
Көрмеге қойылған картиналарда көктем көрінісі, ұлттық ою-өрнектегі әшекей тағынған әйелдер бейнесі, олардың нәзіктігі мен сұлулығы, әртүрлі ұлттардың салт-дәстүрі мен әдет-ғұрыптары, табиғаттың ғажап көрінісі әсем бейнелеген. Бояулар ашық, түстер композициясы бір-бірімен үйлесім тапқан. Бұл – күллі түркі халықтарының ортақ дүниесі.
– Тілдің де, тарихтың да, мәдениеттің де тамыры ортақ екенін әрқашан жадымызда ұстаймыз. Бүгін көрме аясында XIX ғасырдағы күмістен жасалған зергерлік бұйымдардың 70 түрімен танысуға мүмкіндік бар. Бұл – түркі халықтары әйелдерінің «өңіржиек», «бозбанд», «хайкел» кеуде әшекейлері, білезіктер, сақиналар және басқа да әшекейлер, – деді Болат Сәрсенбаев.
Мерекелік іс-шараны Н.Назарбаев орталығы мен Астана қаласының Суретшілер одағы бірлесе ұйымдастырған. Негізгі мақсат – конфессияаралық және мәдениетаралық диалогті нығайту, әлемдік және дәстүрлі дін лидерлері съезінің бастамаларын ілгерілету. Сондай-ақ келушілерді Орталық Азияның бай тарихи-мәдени мұрасымен таныстыруды да мұрат еткен.
– Мұндай мәдени іс-шаралар қазіргі дипломатияның жұмсақ күші деп айтуға болады. Біз қазір жалаң ұранмен ұлыс пен ұлттарды жақындастыра алмаймыз. Бізді жақындататын дүние – терең тарихымыз, салт-дәстүріміз, мәдениетіміз. Дәл осы көрме арқылы Қырғызстан, Қазақстан, Түрікменстан, Қарақалпақстан халықтары әшекейлерінің ұқсастығын байқауға болады. Барлығы бір қолдан шыққандай. Бұның өзі тарихымыздың бір екендігін, түркітілдес халықтарын біріктіретін дүниенің көп екендігін көрсетеді, – дейді Сенат депутаты Бибігүл Жексенбай.
Сонымен қатар көрме барысында белгілі зергер Берік Әлібайдың шәкірттері Зият Сәтінбек пен Манат Аятбек зергерлік бұйымдарды жасау бойынша шеберлік сабақтарын өткізді.
– Зергерлікпен 20 жылдан астам уақыт айналысып келемін. Бізге көбінесе Батыс Қазақстан өңірінен тапсырыс түседі. Қазір 3 шәкіртім бар. Оның бірі Торғай қаласында жеке кәсібін ашып, ісін дөңгелетіп отыр. Ұстазымнан үйренерім әлі көп. Зергерлік ерекше талғам мен асқан шеберлікті қажет етеді. Сондықтан жыл сайын шеберлігіңді шыңдап, жетілдіріп отыруың қажет. Әр маманның өзіндік қыр-сыры болады. Ол қазынасын бірден ашып, алдыңа жая салмайды. Жанында қолғабыс, шәкірті болып, біртіндеп игеріп аласың, – деді М.Аятбек.
Астананың төрінде ашылған эстетикалық талғам мен патриоттық тәрбиеге тұнған көрме келушілерді Бейбітшілік және келісім сарайында 27-наурызға дейін күтеді.
