ҚХР тарапынан COVID-19 пандемиясына байланысты шектеулердің енгізілгеніне қарамастан қазақстандық экспорттаушыларға жүктерді контейнерлермен тасымалдау қолайлы әрі экономикалық тұрғыдан тиімді болып отыр. Ең бастысы, жүктің барар жеріне дін аман жетуіне кепілдік мол. Тіпті теміржолдан түсірілген жүкті автомобиль немесе теңіз көлігі арқылы әуре-сарсаңсыз одан әрі тасымалдауға болады.
«Кедентранссервис» АҚ Павлодар облысы бойынша филиалы 2020 жылдан бері толығымен «Қазақстан темір жолы» АҚ еншілес кәсіпорны болып саналады. Филиал директоры Дәурен Асановтың айтуынша, өнімдерді контейнерлі пойызбен тасымалдау логистикалық шығындарды барынша азайтып, жол жүру уақытын едәуір қысқартады. Мәселен, Қытайға бағыт алған бұл пойыз 7 тәулік ішінде діттеген жерге жетпек. Алдағы уақытта аталған бағыт бойынша пойыздар ай сайын жөнелтіліп тұрмақ.
Экспортталған күнбағыс – павлодарлық шаруалардың өнімдері. Белгілі болғандай, жыл сайын өңірде шамамен 110 мың тонна күнбағыс жиналады екен. Облыс тұрғындарының өсімдік майына деген сұранысы жылына 9 100 тоннаны құрайды. Кісі басына шаққанда әр адам жылына 12 литр өсімдік майын тұтынады. Өңірде қайта өңдеу саласы ақсап тұрғандықтан өнімнің басым бөлігі өзге аймақтарға жөнелтілетінін атап өткен жөн.
Павлодар облысы
