Президенттің тапсырмаларына сәйкес, азаматтарды қолжетімді тұрғын үймен қамтамасыз ету мақсатында 2025 жылы 20 млн шаршы метрден астам тұрғын үй пайдалануға берілген. Бұл туралы өнеркәсіп және құрылыс министрі Ерсайын Нағаспаев Үкімет отырысында мәлімдеді, деп хабарлайды Egemen.kz.
Министрдің айтуынша 2026 жылы 18,5 млн шаршы метр тұрғын үй пайдалануға беріледі. Дегенмен, егер тұрғын үй құрылысын ынталандыру шаралары күшейтілсе, бұл көрсеткіш одан әрі өсуі мүмкін. Негізгі құрылыс жұмыстары Астана, Алматы және Шымкент қалаларында жүргізіледі.
Тұрғын үй кезегі қалай жұмыс істейді?
Саланы қолдау барысында құрылыс алаңдарын қаржыландырудан бастап ипотекалық бағдарламаларды кеңейтуге дейінгі кешенді шаралар жүзеге асырылады. Атап айтқанда, өткен жылы кезекте тұрған азаматтар үшін 218 млрд теңгеге 14,5 мың пәтер сатып алынған, ал «несиелік тұрғын үй» бағдарламасы бойынша 140 млрд теңгеге тағы 14 мың пәтер салынған және сатып алынған.
Мемлекеттік баспаналар жеңілдікпен берілетін 2% және 5%-дық ипотекалық қарыздар арқылы қаржылай қолжетімді болып, оларды 5 мыңнан астам отбасы пайдаланған. «Наурыз» және «Наурыз-Жұмыскер» бағдарламалары арқылы қосымша 233 млрд теңге сомасына 8,6 мың заем берілген.
Тұрғын үй ережесі түбегейлі өзгерді
«Былтыр азаматтарға 8 мыңға жуық жалға берілетін тұрғын үй және 11 мыңнан астам жеңілдікті ипотекалық қарыз берілді. Бұдан басқа, заңға енгізілген түзетулер бұрын «сатып алу құқығынсыз» берілген жалға берілетін тұрғын үйді жекешелендіру құқығын берді, өткен жылы бұл мүмкіндікті 15 мыңнан астам азамат пайдаланды. Сондай-ақ, 11 мыңнан астам адам жалдау ақысының бір бөлігіне субсидияларды пайдаланды, бұл мақсаттарға 7,6 млрд теңге бөлінді», деп атап өтті Ерсайын Нағаспаев.
Министрдің сөзінше, бұл жұмыстар биыл да жалғасып, 11,5 мың пәтер салу үшін 155 млрд теңгеге жергілікті атқарушы органдардың бағалы қағаздары сатып алынбақ, сонымен қатар 18 мыңнан астам жаңа жеңілдікті ипотекалық қарыздар беріледі.
Астанада үлескерлерді алдаған тұрғын үй кешендеріне қатысты қылмыстық іс қозғалды