Астанадағы №73 физика-техникалық лицейінде «Заң және тәртіп» қағидаты аясында Өтеген Сейітов атындағы «Болашақ прокурорлар клубының» ашылу салтанаты өтті. Құқықтық мәдениетті қалыптастыруды көздейтін бұл бастама жасөспірімдердің заңға деген жауапкершілігін арттырып, азаматтық ұстанымын нығайтуға бағытталған.
Салтанатты жиында бірінші болып сөз алған лицей директоры Гүлшат Қалтаева «Болашақ прокурорлар клубының» ашылуын мектептегі маңызды кезең ретінде атап өтті. Оның айтуынша, оқу ошағы білім берумен ғана шектелмей, оқушыларды заңды құрметтейтін, қоғам алдындағы жауапкершілікті сезінетін белсенді азамат етіп тәрбиелеуге басымдық беріп келеді.
«Аталған клубтың негізгі мақсаты – оқушылардың құқықтық сауаттылығын арттыру, тәртіпке баулу және кәсіби бағдар беру. Осы игі бастаманы жүзеге асыру мақсатында Астана қаласы Сарайшық ауданының аудандық прокуратурасы қаладағы 17 мектептен ең үздік 17 оқушыны іріктеп, клуб мүшелігіне қабылдап, салтанатты түрде сертификаттармен марапаттаған еді. Бүгін, міне, осы бастаманың жалғасы ретінде мектебіміздің оқушыларын Өтеген Сейітов атындағы «Жас прокурорлар» клубының қатарына қабылдау рәсімін өткізіп отырмыз. Ұлттық құрылтайда Мемлекет басшысы Қасым-Жомарт Тоқаев балалардың құқықтық сауаттылығын арттыруға, олардың өмір қауіпсіздігін қамтамасыз етуге қатысты нақты тапсырмалар бергені белгілі. Бүгін ашылып отырған мектепішілік клуб осы маңызды бастамаларды өз жоспарына енгізіп, жүйелі әрі нәтижелі жұмыс атқарады деп сенеміз», деді мектеп директоры.
Іс-шара барысында сөз алған Сарайшық ауданы прокурорының орынбасары Бауыржан Асқаров бұл бастаманың тәрбиелік мәніне тоқталды.
«Аталған жоба мектептің тек сапалы білім берумен ғана шектелмей, заңға құрметпен қарауды қалыптастыруға, жастарды жауапты әрі белсенді азамат ретінде тәрбиелеуге айрықша мән беретінін айқын көрсетеді. Мұндай игі істер арқылы болашақта ел мүддесін қорғайтын, әділдікке қызмет ететін саналы ұрпақ қалыптасатынына сенім мол. Ұйымдастырушыларға табыс ал оқушыларға биік мақсат, айқын бағдар және жарқын болашақ тілеймін», деді ол.
Іс-шараға арнайы қатысқан Астана қаласының Бала құқықтары жөніндегі уәкілі Әсима Бимендина да бастаманың маңызын ерекше атап өтті.
«Заң мен тәртіп – бүгінгі қоғам үшін ең өзекті тақырыптардың бірі. Прокуратура қызметкерлерінің балалармен тікелей кездесіп, олардың сұрақтарына жауап беруі, ашық диалог орнатуы жасөспірімдердің құқықтық санасын қалыптастыруға, болашақ өміріне дұрыс бағыт беруге үлкен ықпал етеді деп сенемін. Кейінгі екі-үш жылда прокуратура органдарымен бірлесіп, балалардың қауіпсіздігіне бағытталған көптеген жоба жүзеге асырылды. Бұл жұмыстардың барлығы жас ұрпақтың болашағын қорғауға арналған», деді уәкіл.
Ал Өтеген Сейітов атындағы «Болашақ прокурорлар клубының» жетекшісі Жансері Сенғазы клубтың жұмыс бағыттарына тоқталды. Оның айтуынша, жоба Бас прокуратураның бастамасымен қолға алынып, Астана қаласының Сарайшық ауданы прокуратурасы арқылы жүзеге асырылып келеді. Қазіргі таңда бастама 17 мектепті қамтып отыр.
«Бұл клуб заң мен тәртіп құндылықтарын жас ұрпақтың санасына сіңіруге бағытталған маңызды орта. Алдағы уақытта құқықтық кездесулер, танымдық сабақтар, тәжірибелік жұмыстар мен тәрбиелік іс-шаралар жүйелі түрде өткізілмек. Біз алған білімімізді ел игілігіне жұмсайтын, әділдікке қызмет ететін адал азамат болуға ұмтыламыз», деді клуб жетекшісі.