Елорданың мәдени өмірінде айрықша оқиға болды. «Астана Опера» театрында үш күн қатарынан атақты композитор Джузеппе Вердидің әйгілі «Риголетто» операсының премьерасы өтті. Қойылым қала тұрғындары мен қонақтарына ғажайып көңіл күй сыйлады. Бұл туындыны қоюға Мәдениет және ақпарат министрлігі қолдау көрсетті.
Алғаш рет 1851 жылы Венецияда сахналанған опера терең психологизм мен заманауи музыканы әдемі үйлестірген көркем шығарма. Содан бері де қаншама уақыт өтсе де адам намысының шегі, құштарлық күші және тағдырдың қайғылы шарасыздығы туралы мәңгілік сұрақтардың жауабы табылған емес.
Қойылымды белгілі француздық режиссер Арно Бернар сахналады. Оның есімі елордалықтарға бұған дейінгі Гаэтано Доницеттидің «Махаббат сусыны» спектаклі арқылы жақсы таныс. Режиссер «Риголетто» операсын қоюға көп ізденген. Ол кейіпкерлер бейнесін түрлі мінездер арқылы ашады.
Мәселен, Риголетто – қыршаңқы әрі сайқымазақ. Бір жағынан, тағдыры қиын адам. Ал Джильданың мінезі батыл, қандай қадамға да еркін баратын қыз. Сондай-ақ Мантуя герцогі – әзәзіл әрі өктем. Қойылымда басты партияны Қазақстанның еңбек сіңірген қайраткері Талғат Мұсабаев пен арнайы шақырылған кәріс баритоны Чжунхек Феликс Пак орындады. Екеуі де «Риголетто» образын тамаша сомдады. Бас кейіпкер бейнесі драмалық қуатымен, вокалдық әсемдігімен таңғалдырды. Олар айтқан «Cortigiani, vil razza dannata» ариясы операның барлық эмоциясын дәл жеткізді. Джильдамен болған дуэттер де кейіпкер жанының нәзіктігін ашып көрсетті.
Ал Джильданың партиясын украиналық сопрано Юлия Засимова мен театр жұлдызы Салтанат Ахметова, ал үшінші күні Лейла Аламанова нақышына келтіріп айтты. Осы үшеуі шырқаған «Caro nome» ариясы мінсіз колоратурамен, тазалығымен тәнті етті. Екінші актідегі әкесіне шындығын айтқан сәті көрерменге ұмытылмастай әсер қалдырды. Сонымен қатар Мантуя герцогының партиясын солистер Жан Тапин мен Артур Ғабдиев орындады. Әсіресе бас хормейстер Ержан Дәуітов дайындаған хор да маңызды рөл атқарды. Сарайдағы шытырман оқиғалар сахнасында хордың үні анық әрі қуатты естілді.
Бұл туындыға әлемге танымал өнерпаз Алан Бөрібаев дирижерлік етті.
Маэстро қойылымдағы оқиғаларды музыкамен керемет әсемдеді. Сондай-ақ суретші Анна Верденің еңбегі де ерекше. Оның костюмдері де сол дәуірдің стиліне сай жасалған.
Қысқасы, жұртшылық қойылым соңында театр әртістерінің өнеріне дән риза болып, ұзақ уақыт қол шапалақтап, сахнадан жібермеді.