Қазан айында Ресейде Қазақстан мәдениетінің думаны қызбақшы. Осыған орай, Әбілхан Қастеев атындағы Мемлекеттік өнер музейінің коллекциясынан алынған жауһар туындылар Мәскеудегі атақты Третьяков галереясына жол тартты.
Отандық өнер музейі дайындаған «Қазақстан өнерінің жауһарлары» көрмесі Мемлекеттік Третьяков галереясында 7 қазанда ашылмақшы. Елімізден аттанған экспозицияға ХХ ғасырдың бірнеше буынының 60-тан астам кескіндеме және мүсін шығармасы енген.
Ұлттық бейнелеу өнері мектебінің қалыптасуы қазақ кескіндемесінің атасы Әбілхан Қастеев есімімен байланысты. Оның картиналары өткен ғасырдың басындағы көшпелі өмір өзгерістерінің шежіресі іспетті. 1930–1940 жылдары кәсіби мектептің дамуына көршілес елдердің әр аймағынан келген суретшілер ықпал етсе, 1950 жылдары сурет өнерінің негізін Алматы көркемсурет училищесінің түлектері қалады. Айша Ғалымбаева, Гүлфайрус Исмаилова, Молдахмет Кенбаев, Сабыр Мәмбеев, Қанапия Телжанов, Кәміл Шаяхметов туындылары ұлттық тақырыпқа із салуымен ерекшеленді.
Бұлардың арасында Айша Ғалымбаева қазақ натюрморты жанрын қалыптастырды. Гүлфайрус Исмаилова оған айрықша декоративтік реңк берді. Қанапия Телжанов пен Сабыр Мәмбеев көшпелі мәдениетті романтикалық тұрғыда бейнелеп, адам мен табиғаттың мәңгілік бірлігін көрсетті. Сондай-ақ Сергей Калмыков заманының алдына шығып, өзіндік эстетикалық бейнелер жүйесін жасады.
«Алпысыншы жылғылар» буынының айтулы өкілдері Салихитдин Айтбаев, Тоқболат Тоғысбаев, Шаймардан Сариев – кескіндемеге символика мен түстік-пластикалық эксперименттер әкеліп, жаңа көркемдік өрнекке құлаш ұрды.
1970–1980 жылдары шығармашылықтың даралық қырына басымдық берілді. Камиль Муллашев «Жер мен уақыт. Қазақстан» триптихінде республиканың тың, ғарыштық және индустриялық бейнесін сомдады. Ерболат Төлепбаев кескіндемеге терең философиялық сипат дарытты. Амандос Ақанаев көшпелі өркениеттің киелі нышандарына жаңа мән берді.
1990 жылдары өнердің философиялық мазмұны күшейді. Бақыт Бапишевтің еңбектерінде архаикалық дәстүр абсолюттің метафорасына айналса, Марат Бекеевтің полотноларында көне түркі әлемінен тамыр тартатын адам мен ғалам туралы миф көрініс тапты.
Бұған қоса, көрермендерді Төлеген Досмағамбетов, Еркін Мергенов, Ольга Прокофева, Ескен Сергебаев сынды еліміздің әйгілі мүсіншілерінің туындыларымен де таныстырады. Бұл еңбектер қазақстандық мүсін өнері шеберлерінің шығармашылық ізденіс бағыттары мен басты қызығушылықтарын айқын көрсетеді.