Семейдегі Водный кентінде «Келешек мектептері» жобасы аясында 600 орындық жаңа мектеп пайдалануға берілді. Нысанның ашылу салтанатына облыс әкімі Берік Уәли, Қазақстанның Еңбек Ері, ұлағатты ұстаз Алма Шүкіжанова қатысты.
Водный кентінің балалары енді еңселі де заманауи ғимаратта білім алады. Бұл – «Келешек мектептері» жобасы шеңберінде бой көтерген Семей қаласындағы – екінші, ал Абай облысы бойынша – үшінші білім ордасы. Үш қабатты мектепте 28 оқу кабинеті, физика, химия, биология, роботтехника, графика және модельдеу бөлмелері, ағаш және металл өңдеу, тігін және кулинария шеберханалары бар. Сонымен қатар акт залы, асхана, 7 зертхана, кітапхана, оқу залы мен коворкинг аймақтары қарастырылған. Аулада футбол, волейбол, баскетбол алаңдары, жүгіру жолақтары мен спорт залы бар.
Мектеп бір ауысымда, мемлекеттік тілде білім береді. 1-11 сынып аралығында 22 сынып-комплект және 1 мектепалды даярлық сынып ашылады. Салтанатты іс-шараға қатысқан аймақ басшысы ұстаздар мен ата-аналарды, оқушыларды айтулы оқиғамен құттықтады.
«Елімізде Мемлекет басшысы Қасым-Жомарт Кемелұлы Тоқаевтың бастамасымен жүзеге асып жатқан «Келешек мектептері» ұлттық жобасы аясында көптеген жаңа оқу ордасы салынып жатыр. Біздің өңірімізде де бірнешеуі бой көтерді. Осындай келелі бастамалар арқылы балаларға қолайлы, қауіпсіз, заманауи білім беру ортасын қалыптастыруға бағытталған жүйелі қадамды көруге болады. Соның айқын көрінісі – бүгін Семей қаласының Водный кентінде бой көтерген 600 орындық жаңа мектеп. Бұл – ұстаздың арманын, ата-ананың сенімін, баланың үмітін тоғыстырған ортақ қуаныш. Бүгінгі ашылған мектеп – болашаққа деген сенімнің рәмізі. Баршаңызды жаңа оқу жылының басталуымен шын жүректен құттықтаймын», деді облыс әкімі.
Аймақ басшысы мектептің сыныптарын, асхана, спорт залды көріп, оқушылармен, мұғалімдермен пікірлесті.
Қазіргі уақытта облыста «Келешек мектептері» ұлттық жобасы аясында екі мектеп салынып жатыр. Аягөз қаласындағы 600 орындық мектеп 2-тоқсанда пайдалануға берілмек. Семейдің Шығыс кентінде 300 орындық мектептің құрылысы жүргізілуде. Жалпы, облыстағы 8200 орын тапшылығының 31 пайызы осы жобамен салынып жатқан 5 мектеп есебінен шешілмек. Қалған тапшылықты жою үшін республикалық бюджет есебінен алдағы үш жылда 11 мектеп салу жоспарланған.
Апатты жағдайда деп танылған үш мектептің мәселесі де кезең-кезеңімен шешіліп келеді. Жарма ауданының Суықбұлақ ауылында 100 орындық жаңа мектептің құрылысы басталды. Ақсуат ауданындағы Екпін ауылында 300 орындық мектептің құрылысы басталады. Семейдегі №11 мектептің орнына жаңа мектеп салуға құжат әзірленіп жатыр.
СЕМЕЙ